İran İsrail qoşunlarını Livan ərazisindən çıxarmadığı müddətdə müharibəni başa çatmış hesab etməyəcək.
EDnews xəbər verir ki, bunu İran Xarici İşlər Nazirliyinin rəsmi nümayəndəsi İsmayıl Bəqai Livanın “Əl-Əxbar” nəşrinə müsahibəsində bildirib.
Onun sözlərinə görə, ABŞ və İran arasında razılaşdırılmış sənəddə Livanın suverenliyi və ərazi bütövlüyünə zəmanət verilməsi öhdəliyi yer alıb.
Tehran hesab edir ki, bu, İsrail qoşunlarının Livan ərazisindən çıxarılmasını nəzərdə tutur.
Bəqai bildirib ki, İsrailin Livanın cənubunda hərbi mövcudluğunu davam etdirməsi əldə olunmuş razılaşmaların faktiki olaraq ləğvi anlamına gələcək.
“Sənəddə Livanın suverenliyi və ərazi bütövlüyünə zəmanət verilməsi öhdəliyi var. Bu isə o deməkdir ki, işğalçı qüvvələr Livan torpaqlarını tərk etməlidir. Biz müharibənin başa çatmasına hazırıq, lakin sionist düşmən orada qaldığı müddətdə müharibə bitmiş sayılmayacaq”, — deyə Bəqai bildirib.
İran XİN rəsmisi həmçinin qeyd edib ki, Tehranın İsrailə münasibəti dəyişməyib. Onun sözlərinə görə, İran İsrailə qarşı düşmənçilik xarakterli addımlar atmamağı öhdəsinə götürür. Eyni öhdəlik İranın ölkə xaricindəki müttəfiqlərinə də şamil olunur.
“Sənəddə İsrailin adı çəkilmir və bizim bu cinayətkar rejimə münasibətimiz əvvəlki kimi qalır. Lakin razılaşma bir tərəfdən ABŞ və onun müttəfiqləri, digər tərəfdən isə İran və onun müttəfiqləri arasında müharibənin başa çatmasından bəhs edir”, — deyə o vurğulayıb.
"Reuters"in məlumatına görə, İsrail Livanın cənubunda hərbi mövcudluğunu saxlamaq üçün ABŞ ilə danışıqlar aparır.
İsrail tərəfi şimal sərhədlərinin “Hizbullah” tərəfindən mümkün hücumlardan qorunması üçün Litani çayının cənubunda bufer zonaların saxlanılmasının vacib olduğunu bildirir.
Qeyd edək ki, Livanın cənubundakı Litani çayı regionda strateji əhəmiyyət daşıyır.
Aysel Hacıyeva | EDnews
