Rusiya silahlı qüvvələri Ukraynanın ərazilərinə zərbələr endirməyə davam edir.
EDnews xəbər verir ki, iyunun 17-i gecə saatlarında PUA ilə Sumı vilayətində yerləşən atçılıq idman məktəbinə hücum olunub.
Hadisə nəticəsində heyvanlar tələf olub. Bu barədə Sumı Vilayət Hərbi Administrasiyasının rəhbəri Oleq Qriqorov məlumat verib.
Onun sözlərinə görə, Rusiya PUA-sı gecə saatlarında hər gün uşaqların məşq etdiyi mülki obyektə zərbə endirib. O qeyd edib ki, məktəbin əməkdaşları xəsarət almayıb.
Eyni zamanda Zaporojye vilayətinə də kütləvi zərbələr endirilib. Ukrayna Fövqəladə Hallar Xidmətinin məlumatına görə, hücum nəticəsində bir nəfər həlak olub, daha yeddi nəfər yaralanıb.
Qurumdan bildirilib ki, zərbədən sonra üçmərtəbəli yaşayış binasında yanğın baş verib. Yanğını yalnız səhərə yaxın söndürmək mümkün olub. Şəhərin bir neçə rayonunda yaşayış evləri, avtomobillər və mülki infrastruktur obyektləri də zədələnib.
Rusiya Müdafiə Nazirliyindən isə bildirilib ki, gecə ərzində Rusiya regionları və Qara dəniz üzərində Ukraynaya məxsus 157 PUA zərərsizləşdirilib.
Aysel Hacıyeva | EDnews
