Yadplanetli sivilizasiyaların axtarışı gözlənilməz amil səbəbindən çətinləşə bilər.
EDnews xəbər verir ki, SETI İnstitutunun alimləri bu qənaətə gəliblər. Araşdırmanın nəticələri “The Astrophysical Journal” jurnalında dərc olunub.
Onilliklərdir ki, alimlər kosmosda çox dar diapazonlu radiosiqnallar axtarırlar. Belə siqnalların təbii yolla yaranmasının az ehtimal edildiyi və bu səbəbdən inkişaf etmiş sivilizasiyaların fəaliyyəti ilə bağlı ola biləcəyi düşünülür.
Lakin yeni tədqiqat göstərir ki, hətta ideal şəkildə dar olan radiosiqnal da öz ulduz sistemini tərk etməzdən əvvəl xarakterik xüsusiyyətlərini itirə bilər.
Əvvəllər SETI mütəxəssisləri əsasən ulduzlararası məkanın radiodalğaların yayılmasına təsirini nəzərə alırdılar. Yeni araşdırmanın müəllifləri isə siqnal mənbəyinə daha yaxın ərazilərdə baş verən prosesləri araşdırıblar.
Məlum olub ki, radiodalğalar ulduz küləyi və güclü alışmalar zamanı yaranan koronal kütlə atılmaları nəticəsində plazmanın təsirinə məruz qala bilər. Bu proseslər siqnalın enerjisini daha geniş tezlik diapazonuna yaya bilir.
Nəticədə radioteleskopların axtardığı dar və aydın siqnal zirvəsi zəifləyir, daha az nəzərə çarpır və aşkarlanma həddindən aşağı düşə bilər.
Tədqiqatçılar bu təsirin miqyasını qiymətləndirmək üçün Günəş sistemində işləyən kosmik aparatların radiosiqnallarına dair məlumatlardan istifadə ediblər. Bu müşahidələr turbulent plazmanın radiodalğaların yayılmasına necə təsir etdiyini anlamağa imkan verib.
Daha sonra alimlər əldə edilən nəticələri müxtəlif ulduz tiplərinə tətbiq edərək onların aktivliyinin potensial yadplanetli sivilizasiya siqnallarını necə dəyişə biləcəyini hesablayıblar.
Araşdırmada xüsusi diqqət qırmızı cırtdanlara — M sinfinə aid kiçik ulduzlara yönəlib. Bu ulduzlar Süd Yolu qalaktikasındakı bütün ulduzların təxminən 75 faizini təşkil edir və yaşayış üçün əlverişli planetlərin axtarışında əsas hədəflərdən sayılır.
Bununla belə, qırmızı cırtdanlar çox vaxt yüksək aktivliyi ilə seçilir. Bu isə onların ətrafında yaranan və ya yayılan potensial radiosiqnalların təhrif olunması ehtimalını artırır.
Tədqiqat müəlliflərinin fikrincə, əldə olunan nəticələr yadplanetli sivilizasiyaların axtarış strategiyalarına yenidən baxılmasını tələb edə bilər. Alimlər yalnız ultra dar siqnallara deyil, aktiv ulduz mühitindən keçdikdən sonra genişlənmiş radi imzalara da diqqət yetirməlidirlər.
Araşdırma yadplanetli sivilizasiyalardan indiyə qədər siqnal aşkarlanmamasını tam izah etmir. Lakin nəticələr göstərir ki, belə siqnalların diqqətdən yayınmasının mümkün səbəblərindən biri ulduz aktivliyi ola bilər.
Əgər bu qənaətlər təsdiqlənsə, bəzi potensial texnosiqnaturalar artıq mövcud müşahidə məlumatlarında ola bilər. Sadəcə, hazırkı axtarış alqoritmləri onları süni siqnal kimi tanımaya bilər.
