Afrika Xəstəliklərə Nəzarət və Profilaktika Mərkəzi - Afrika CDC Demokratik Konqo Respublikasında davam edən Ebola epidemiyası ilə bağlı həyəcan təbili çalıb.
EDnews xəbər verir ki, bu barədə "Reuters" məlumat yayıb.
Afrika CDC-nin baş direktoru Jean Kaseya Afrika liderlərinin onlayn formatda qatıldığı toplantıda bildirib ki, virus daşıyıcıları ilə təmasda olduğu ehtimal edilən on minlərlə şəxs hələ də müəyyən edilərək nəzarətə götürülməyib. Onun sözlərinə görə, bu vəziyyət epidemiyanın qarşısının alınmasını ciddi şəkildə çətinləşdirir.
Kaseya xəbərdarlıq edib ki, Ebola epidemiyası qısa müddətdə dayandırılmasa, Afrika daha əvvəl yaşananlardan da ağır mənzərə ilə üzləşə bilər.
O, vəziyyətin 2014–2016-cı illərdə Qvineya, Liberiya və Sierra-Leonedə 11 mindən çox insanın ölümünə səbəb olan Qərbi Afrika Ebola epidemiyasından, eləcə də 2018-ci ildə Konqonun şərqində qeydə alınan epidemiyadan daha ciddi nəticələr doğura biləcəyini qeyd edib.
Ümumdünya Səhiyyə Təşkilatının məlumatına görə, hazırkı epidemiya 2026-cı ilin mayında Demokratik Konqo Respublikası və Uqandada təsdiqlənib. Təşkilatın son açıqlamalarında təmaslı şəxslərin izlənilməsi, klinik hazırlıq və sürətli müdaxilənin əsas prioritet olduğu vurğulanıb.
G7 liderləri də Konqoda Ebola epidemiyasına qarşı koordinasiyalı beynəlxalq cavab tədbirlərinin gücləndirilməsinə çağırış ediblər. Onlar virusun yayılmasının qarşısını almaq üçün əlavə resursların səfərbər olunmasının vacibliyini bildiriblər.
Qeyd edək ki, mütəxəssislər Ebola ilə mübarizədə ən mühüm mərhələlərdən birinin xəstələrlə təmasda olan şəxslərin vaxtında aşkarlanması və nəzarət altında saxlanılması olduğunu bildirirlər.
.jpg)
