Dünyada getdikcə daha çox insan xəbərləri izləməkdən uzaqlaşır.
EDnews xəbər verir ki, bu barədə “The Conversation” nəşri yazıb.
Mütəxəssislərin fikrincə, bunun səbəbi insanların dünyada baş verən hadisələrə marağının azalması deyil. Əsas problem insan beyninin davamlı mənfi informasiya axınına uyğunlaşmaqda çətinlik çəkməsidir.
Reuters İnstitutunun məlumatına görə, 2025-ci ildə kanadalıların təxminən 69 faizi ən azı bəzən xəbərlərdən yayındığını bildirib. Dünyada isə bu göstərici 40 faizə çatıb ki, bu da müşahidələr tarixində ən yüksək səviyyə hesab olunur.
İnsanlar xəbərlərdən uzaqlaşmalarını əsasən onların əhval-ruhiyyəni korlaması, stress yaratması və baş verən proseslərə təsir etmək imkanının olmadığı hissi ilə izah edirlər.
İnkişaf psixologiyası üzrə tədqiqatçıların sözlərinə görə, problem “mənfi düşüncə meyli” ilə bağlıdır. Təkamül prosesində insan beyni təhlükələrə xüsusi diqqət yetirməyə uyğunlaşıb. Bu xüsusiyyət qədim dövrlərdə sağ qalmaq üçün vacib idi.
Alimlər bildirirlər ki, insanın əcdadları yırtıcı heyvanları, düşmən tayfaları və təbii fəlakətləri vaxtında görməli idilər. Buna görə də mənfi informasiya beyində daha tez emal olunur, daha yaxşı yadda qalır və müsbət məlumatlarla müqayisədə daha güclü emosional reaksiya yaradır.
Lakin əvvəllər təhlükələr əsasən lokal xarakter daşıyırdısa, bu gün insan hər gün dünyanın müxtəlif yerlərində baş verən müharibələr, təbii fəlakətlər, iqtisadi böhranlar və cinayətlər barədə məlumatlarla qarşılaşır.
Araşdırmalara görə, xəbər başlığında hər əlavə mənfi söz istifadəçinin həmin materialı açma ehtimalını artırır. Müsbət ifadələr isə əksinə, auditoriyanın marağını azalda bilər.
Mütəxəssislər qeyd edirlər ki, orqanizm bəzən narahatedici xəbərlərə insan onların mənasını tam dərk etməzdən əvvəl reaksiya verir. Bu isə xroniki stressə və emosional tükənməyə səbəb ola bilər.
Bununla belə, alimlər xəbərlərdən tam imtinanı çıxış yolu hesab etmirlər. Onların fikrincə, xəbər istehlakına sərf olunan vaxt məhdudlaşdırılmalı, sosial şəbəkələrdə sonsuz informasiya axını əvəzinə keyfiyyətli analitik materiallara üstünlük verilməlidir.
