Böyük Britaniyanın Baş naziri Kir Starmer Rusiya hərbi gəmisi “Admiral Qriqoroviç”in La-Manş boğazında Britaniya bayraqlı mülki yaxtanın yaxınlığında xəbərdarlıq atəşi açmasını pisləyib.
EDnews xəbər verir ki, bu barədə “Reuters” məlumat yayıb.
Starmer Fransada keçirilən G7 sammiti çərçivəsində insidentə münasibət bildirib. O, hadisənin Böyük Britaniyanın ərazi sularına yaxın ərazidə baş verdiyini və ciddi narahatlıq doğurduğunu deyib.
“La-Manşda baş verənlər dərin narahatlıq doğurur. Bu, düşünülməmiş addım idi. Belə bir hadisə baş verməməli idi. Yaxtada olan cütlük, görünür, ciddi qorxu keçirib”, — deyə Britaniya Baş naziri bildirib.
Böyük Britaniya Müdafiə Nazirliyinin məlumatına görə, insident zamanı Rusiya hərbi gəmisi drift vəziyyətində olub. Nazirlik xəbərdarlıq atəşinin mülki gəmiyə istiqamətləndiyini təsdiqləyib.
Hadisədən əvvəl “Admiral Qriqoroviç”in Britaniya bayraqlı yaxtaya yaxın məsafədə olduğu bildirilir. Rusiya tərəfinin versiyasına görə, yaxta hərbi gəmiyə təhlükəli şəkildə yaxınlaşıb və radio əlaqəsi üzrə sorğulara cavab verməyib. Buna görə də xəbərdarlıq atəşi açılıb.
Məlumatlara əsasən, insident La-Manş boğazında, Uayt adasından təxminən 20 dəniz mili cənubda, Böyük Britaniyanın ərazi sularından kənarda baş verib. Hadisə nəticəsində xəsarət alan olmayıb.
“Admiral Qriqoroviç” Rusiya Qara dəniz donanmasına məxsusdur və bir müddətdir Britaniya ərazi sularına yaxın ərazilərdə müşahidə olunur. Gəminin daha əvvəl Rusiyanın “kölgə donanması”na aid tankerləri müşayiət etdiyi də bildirilir.
Qeyd edək ki, son həftələrdə Qərb ölkələri Rusiyanın neft sanksiyalarından yayınmaq üçün istifadə etdiyi “kölgə donanması”na qarşı tədbirləri gücləndirib. Bu fonda La-Manşda baş verən insident Moskva ilə London arasında dəniz təhlükəsizliyi ilə bağlı gərginliyi yenidən artırıb.
