Ermənistanda keçirilən parlament seçkiləri zamanı 50-dən çox pozuntu iddiası daxil olub.
EDnews xəbər verir ki, Ermənistan Daxili İşlər Nazirliyinin mətbuat xidmətinin yaydığı məlumata görə, iyunun 7-də saat 11:00-a olan məlumata əsasən, ümumilikdə 53 pozuntu iddiası qeydə alınıb. Onlardan 17-si qaynar xətt vasitəsilə daxil olub.
Məlumatda iki təkrar səsvermə halının da qeydə alındığı bildirilib. Eyni zamanda, ölkədə qüvvədə olan “sükut günü” qaydalarına əməl olunub-olunmamasını müəyyən etmək məqsədilə media və sosial şəbəkələrdə seçkilərlə bağlı paylaşımlar nəzarətdə saxlanılır. Ermənistanda “sükut günü” saat 20:00-dək davam edir.
Qeyd edək ki, Ermənistanda bu gün parlament seçkiləri keçirilir. Seçicilərin ümumi sayı 2 milyon 485 min 851 nəfərdir. Seçkilərdə iki blok və 16 siyasi partiya iştirak edir.
Mövcud qanunvericiliyə əsasən, partiyalar üçün parlamentə keçid həddi 4 faiz, üç partiyaya qədər olan bloklar üçün 8 faiz, dörd və daha çox partiyanın daxil olduğu bloklar üçün isə 10 faiz müəyyən edilib. Seçkilərdə minimum iştirak həddi nəzərdə tutulmayıb.
Aytac Kərimova | EDnews
