Bakı Enerji Həftəsi çərçivəsində "Risklərin müəyyənləşdirilməsindən hadisələrin qarşısının alınmasınadək – Praktiki SƏTƏM vasitələri" adlı peşəkar inkişaf sessiyası keçirilib.
EDnews xəbər verir ki, sessiyanın moderatoru SOCAR Upstream Operations Management-də SƏTƏM üzrə baş menecer Nicat Məmmədov olub.
Sessiyada SKB-nin təlim direktoru Leyda Monterrosa və Vimal Fire Controls Pvt. Ltd şirkətinin satış və marketinq direktoru Falqun Doşi məruzələrlə çıxış ediblər.
Sessiya zamanı neft-qaz sənayesində təhlükəsizliyin artırılması üçün süni intellekt və rəqəmsal texnologiyaların tətbiqi məsələləri müzakirə olunub.
Çıxışlarda bildirilib ki, müasir süni intellekt həlləri qazma əməliyyatları, dövriyyə prosesləri və digər iş şəraitlərini real vaxt rejimində təhlil edərək təhlükəli vəziyyətləri müəyyən edə bilir. Sistem hər hansı təhlükəsizlik pozuntusu aşkar etdikdə əməkdaşlara səsli xəbərdarlıq göndərir.
Qeyd olunub ki, bu texnologiyalar artıq Yaxın Şərq, Şimali Amerika və Asiyada tətbiq edilir. Tətbiq nəticəsində həm təhlükəli hadisələrin vaxtında aşkarlanması, həm də risklərin görünürlüğünün artırılması istiqamətində mühüm nəticələr əldə olunub. Hazırda bu sahədə yeni pilot layihələrin həyata keçirilməsi nəzərdən keçirilir.
Tədbirdə rəqəmsal təlim metodlarının da əhəmiyyətinə toxunulub. Bildirilib ki, rəqəmsal emalatxanalar və ssenari modelləşdirməsi vasitəsilə fərdi mühafizə vasitələrinin istifadəsi, yüklərin qaldırılması əməliyyatları və digər riskli proseslər simulyasiya edilir. Bu yanaşma əməkdaşların müxtəlif şəraitlərdə davranışlarını və qərarvermə mexanizmlərini daha yaxşı anlamağa imkan yaradır.
Çıxış zamanı avtonom əməliyyatların inkişaf perspektivləri də diqqətə çatdırılıb. Vurğulanıb ki, robot texnologiyalarının tətbiqi yüksək riskli zonalarda insan iştirakını azaltmaqla yanaşı, məlumatların daha təhlükəsiz və səmərəli şəkildə toplanmasına şərait yaradır.
Yanğın təhlükəsizliyi ilə bağlı təqdimatda qeyd olunub ki, ənənəvi yanğınsöndürmə sistemləri, uzaqdan idarəetmə texnologiyaları və dron müşahidə sistemlərinin əsas məqsədi yanğınların qarşısını almaq və fövqəladə hallara daha operativ reaksiya verməkdir. Bildirilib ki, yanğınların söndürülməsi prosesində xüsusi tankerlərdən də istifadə olunur. Bu yanaşma hadisələrə daha çevik müdaxilə imkanı yaradır və bir çox hallarda yanğının 10-15 dəqiqə ərzində lokallaşdırılaraq söndürülməsinə şərait yaradır.
Məruzəçilər texnologiyaların inkişafı ilə yanaşı, insan amilinin də xüsusi əhəmiyyət daşıdığını vurğulayıblar. Onların sözlərinə görə, insan performansı insanların qərarvermə, qarşılıqlı əlaqə və iş proseslərinə reaksiyasını əhatə edir və təhlükəsizlik mədəniyyətinin formalaşmasında mühüm rol oynayır.
Sessiyada Beynəlxalq Neft və Qaz İstehsalçıları Assosiasiyası (IOGP) ilə birgə tətbiq olunan insan performansı prinsiplərindən də bəhs olunub. Bildirilib ki, səhvlər insan fəaliyyətinin təbii hissəsidir, günahlandırma problemləri həll etmir, davranışa iş mühiti və şərait təsir göstərir, davamlı öyrənmə vacibdir və liderlərin reaksiyası təhlükəsizlik mədəniyyətinin formalaşmasında həlledici rol oynayır.
Sonda vurğulanıb ki, süni intellekt və digər innovativ texnologiyaların uğurlu tətbiqi üçün onların insan amili nəzərə alınmaqla inteqrasiyası, dəyişikliklərin düzgün idarə olunması, pilot layihələrin həyata keçirilməsi və əməkdaşların prosesə cəlb olunması əsas şərtlərdəndir.
Aytac Kərimava | EDnews
.jpg)
.jpeg)
