.jpg)
Siyasi şərhçi Azər Həsrət EDnews-a açıqlamasında Ermənistan-Azərbaycan münasibətlərində normallaşma prosesinin real mərhələyə keçdiyini bildirib.
Həmçinin o bildirib ki, Ermənistan parlamentinin sədri Alen Simonyanın Azərbaycana səfərlə bağlı səsləndirdiyi fikirlər təəccüblü deyil.
Onun sözlərinə görə, bundan əvvəl Ermənistanın Baş naziri Nikol Paşinyan da Avropa Siyasi Birliyinin toplantısı zamanı 2028-ci ildə Azərbaycanda keçiriləcək analoji tədbirdə iştirak etməyə hazır olduğunu açıq şəkildə bəyan etmişdi:
“Paşinyanın həmin açıqlamasından sonra Alen Simonyanın da oxşar mövqedən çıxış etməsi tamamilə normaldır. Çünki artıq aradakı qarşıdurmalar arxa plana keçir, sülh prosesi davam edir və tərəflər münasibətlərin normallaşdırılmasına doğru irəliləyirlər”, – deyə o vurğulayıb.
Azər Həsrət hesab edir ki, sülh sazişinin imzalanmasından sonra iki ölkə arasında sərhədlərin və kommunikasiyaların açılması münasibətləri tamamilə yeni mərhələyə daşıyacaq:
“Belə bir şəraitdə Azərbaycan və Ermənistan normal qonşuluq münasibətləri qurmalıdır. Mən həm Paşinyanın, həm də Simonyanın səsləndirdiyi fikirləri səmimi qəbul edirəm. Onlar anlayırlar ki, başqa yol yoxdur və qarşılıqlı anlaşma məhz bu şəkildə formalaşmalıdır”.
Siyasi şərhçi Ermənistanda Azərbaycan və Türkiyə bayraqlarının yandırılması hallarına da münasibət bildirib. O qeyd edib ki, bu cür təxribatların Ermənistanın hazırkı hakimiyyəti tərəfindən təşkil edildiyini düşünmür:
“Bu aksiyaların arxasında daha çox revanşist qüvvələr və xarici təsir mərkəzləri dayanır. Ermənistanla Azərbaycan, eləcə də Ermənistanla Türkiyə arasında münasibətlərin normallaşmasını istəməyən dairələr müxtəlif təxribatlara əl atırlar”.
Onun sözlərinə görə, Ermənistan cəmiyyətində fərqli düşüncələr mövcuddur və bu səbəbdən belə təxribat xarakterli hadisələrin baş verməsi mümkündür. Lakin bu hallar rəsmi İrəvanın mövqeyini əks etdirmir.
Azər Həsrət vurğulayıb ki, Ermənistan rəhbərliyinin Qarabağla bağlı son illərdə səsləndirdiyi fikirlər də onların mövqeyində ciddi dəyişikliklərin olduğunu göstərir:
“Bu gün Ermənistanın ən yüksək səviyyəli rəsmiləri açıq şəkildə Qarabağın Azərbaycan ərazisi olduğunu bəyan edirlər. Əgər bu fikirlər ölkənin ali siyasi rəhbərliyi tərəfindən səsləndirilirsə, bunu sadəcə siyasi oyun kimi qiymətləndirmək çətindir. Mən onların səmimiyyətinə inanıram”.
Siyasi şərhçi hesab edir ki, gələcəkdə yüksək səviyyəli qarşılıqlı səfərlərin baş tutması da mümkündür:
“Əgər uyğun şərait yaranarsa və rəsmi dəvət olarsa, Ermənistan rəhbərliyinin Azərbaycana səfər etməsi real görünür. Artıq münasibətlərdə yeni mərhələnin konturları formalaşmaqdadır”.
Azər Həsrət sonda Azərbaycan cəmiyyətinin təmkinli mövqe nümayiş etdirdiyini vurğulayıb:
“Azərbaycan cəmiyyəti kifayət qədər təmkinlidir. Bayrağımıza qarşı təxribat xarakterli hərəkətlərə baxmayaraq, biz eyni davranışla cavab vermədik. Bu, cəmiyyətimizin siyasi yetkinliyinin və məsuliyyətinin göstəricisidir. Regionda sülhün və sabitliyin qorunması üçün təxribatlara uymamaq vacibdir”.
İbrahim Əzizov | EDnews
.png)
