ABŞ Prezidenti Donald Tramp administrasiyasındakı yaxın çevrəsi ilə söhbətlərdə vitse-prezident Ceyms Di Vensin gələcəkdə Respublikaçılar Partiyasının əsas lideri və MAGA hərəkatının varisi olub-olmayacağı ilə bağlı şübhələrini dilə gətirir.
EDnews-un məlumatına görə, Tramp Vensi avtomatik və mübahisəsiz siyasi varis hesab etmir.
O, yaxınlarına bildirib ki, vitse-prezident indiyədək onun siyasi dəstəyi olmadan böyük seçki qələbəsi qazanmayıb.
Tramp, xüsusilə, Vensin Ohayo ştatından Senata seçilməsində öz rolunu vurğulayır.
ABŞ liderinin narahat olduğu məqamlardan biri də Vensin bəzi xarici siyasət məsələlərində ilkin tərəddüdləri olub. Tramp dəfələrlə vitse-prezidentin İranla bağlı qərarlara əvvəlcə ehtiyatla yanaşdığını xatırladıb. Həmçinin Vensin rəhbərlik etdiyi Pakistan missiyasının nəticələri də Ağ Evdə birmənalı qarşılanmayıb.
Mənbələrin sözlərinə görə, Tramp vitse-prezidentin ictimai imicinə də diqqət yetirir. O, Vensin 2025-ci ildə Ağ Evdə keçirilən tədbirdə futbol çempionatının kubokunu yerə saldığı hadisəni bir neçə dəfə yada salıb. Bundan başqa, vitse-prezidentin sosial şəbəkələrdə fəallığı və tənqidçilərlə açıq polemikalara girməsi də administrasiyada müzakirə mövzusudur.
Bununla yanaşı, Vens Respublikaçı seçicilər arasında populyarlığını qoruyur. O, bu ilin mart ayında keçirilən mühafizəkarların ənənəvi CPAC sorğusunda 2028-ci il prezident seçkiləri üçün əsas favorit kimi göstərilib.
Lakin Trampın diqqət mərkəzində yalnız Vens yoxdur. ABŞ dövlət katibi Marco Rubio də potensial namizədlər arasında göstərilir. Rubio son aylarda Trampla daha sıx işləyən və prezidentlə tez-tez birgə səfərlərə çıxan siyasətçi kimi ön plana çıxıb.
Məlumata görə, Tramp yaxın ətrafında həm Vens, həm də Rubio ilə bağlı müxtəlif ssenariləri müzakirə edir və hələlik açıq şəkildə heç bir namizədi öz siyasi varisi elan etməyib.
ABŞ prezidentinin bu məsələ ilə bağlı son açıqlamalarından birində isə belə dediyi bildirilir:
"Bu vəzifəni kim alırsa, çox vacib şəxs olacaq. Əgər səhv adam seçilərsə, bu, fəlakətlə nəticələnə bilər."
Beləliklə, 2028-ci il prezident seçkilərinə hələ vaxt qalsa da, Respublikaçılar Partiyasında Trampdan sonrakı liderlik uğrunda mübarizənin artıq başladığı görünür.
Aytac Kərimova | EDnews
.png)
