Enerji Həftəsi çərçivəsində “Nəqliyyat dəhlizlərinin inkişafı: Şimal-Cənub və Orta Dəhliz” mövzusunda keys sessiyası keçirilib.
EDnews xəbər verir ki, sessiyanın moderatoru Azərbaycan Gömrük Təmsilçiliyi və Logistika Şirkətləri Assosiasiyasının komitə rəhbəri Lamiyə Xəlilova olub.
Tədbirdə Qazaxıstan Neft və Qaz Şurası “PetroCouncil”un Rəyasət Heyətinin sədri Rzabek Artıqaliyev, GLT Transport MMC-nin direktoru Dürdanə Səfərova, satış və marketinq direktoru Rene Sörensen Nordal, eləcə də digər beynəlxalq ekspertlər çıxış ediblər.
Sessiyada çıxış edən Rzabek Artıqaliyev Orta Dəhlizin Qazaxıstan üçün strateji əhəmiyyətindən danışaraq bildirib ki, ölkə alternativ nəqliyyat marşrutlarının inkişafına xüsusi diqqət yetirir.
Onun sözlərinə görə, 2025-ci ildə Qazaxıstan Çinə boru kəmərləri vasitəsilə 1 milyon ton neft ixrac edib, Aktau limanı üzərindən isə 1,3 milyon ton neft daşınıb. 2026-cı ildə bu göstəricinin 1,6 milyon tona çatdırılması planlaşdırılır.
Artıqaliyev vurğulayıb ki, Xəzər Boru Kəməri Konsorsiumu (CPC) ilə daşınan böyük həcmli yüklərə baxmayaraq, hava şəraiti, texniki xidmət və geosiyasi amillər bu marşrut üçün müəyyən risklər yaradır. Bu baxımdan Orta Dəhliz Qazaxıstan üçün əsas alternativ və təhlükəsiz nəqliyyat xətti kimi ön plana çıxır. Onun fikrincə, marşrut artıq təkcə Qazaxıstanın deyil, bütövlükdə Avrasiyanın enerji təhlükəsizliyinin mühüm elementinə çevrilib.
Tədbirdə çıxış edən Rene Sörensen Nordal isə enerji və nəqliyyat infrastrukturunun inkişafında “virtual boru kəməri” modelinin rolundan bəhs edib. O qeyd edib ki, Xəzər regionunda təbii qaz ehtiyatları və tələbat mövcud olsa da, yeni boru kəmərlərinin tikintisi müəyyən vaxt tələb edir.
“Bu boşluğu sıxılmış qazın xüsusi konteynerlər vasitəsilə avtomobil nəqliyyatı ilə daşınması hesabına doldurmaq mümkündür. Beləliklə, sənaye müəssisələri və yanacaqdoldurma məntəqələri boru kəmərlərinin istifadəyə verilməsini gözləmədən qazla təmin oluna bilər”, – deyə o bildirib.
Nordalın sözlərinə görə, bu model həm iri sənaye istehlakçılarının fasiləsiz enerji təminatına, həm də magistral şəbəkədən uzaqda yerləşən kiçik istifadəçilərin qazla təmin olunmasına imkan yaradır. O əlavə edib ki, çevik logistika həlləri nəqliyyat xərclərini azaltmaqla yanaşı, enerji resurslarının daha əlçatan şəkildə çatdırılmasına şərait yaradır.
Sessiyada həmçinin Şimal-Cənub və Orta Dəhlizlərin regional ticarət, enerji təhlükəsizliyi və logistika əlaqələrinin genişləndirilməsində oynadığı rol, eləcə də nəqliyyat infrastrukturu sahəsində yeni texnologiyaların tətbiqi məsələləri müzakirə olunub. Ekspertlər bu marşrutların Avrasiya məkanında yükdaşımaların şaxələndirilməsi və təchizat zəncirlərinin dayanıqlığının artırılması baxımından mühüm əhəmiyyət kəsb etdiyini vurğulayıblar.
Aytac Kərimova | EDnews
.jpg)
.jpeg)
