Bakı Enerji Həftəsi çərçivəsində “Neft və qaz yataqlarının inkişafı üçün yeni layihələr: Müasir texnologiyaların tətbiqi təcrübəsi” adlı keys sessiyası keçirilib.
EDnews xəbər verir ki, sessiyanın moderatoru “Newsbase” nəşrinin redaktoru CO Mörfi olub.
Tədbirdə “Bahar Energy Operating Company”nin Performans və texnologiya departamentinin direktoru Orxan Hüseynov, "SOCAR Upstream Management International" LLC-nin icraçı direktorunun müşaviri Ayaz Əmirov və BP-nin baş neft mühəndisi Turan Eyyubbəyli məruzəçi qismində çıxış ediblər.
Müzakirələr zamanı neft və qaz yataqlarının işlənməsində müasir texnologiyaların tətbiqi, rəqəmsal transformasiya, mövcud infrastrukturun yenilənməsi və hasilatın səmərəliliyinin artırılması istiqamətində həyata keçirilən layihələrdən bəhs olunub.
Çıxışlarda qeyd edilib ki, sənayedə uzun illərdir istismar olunan sistemlər hələ də dəyər yaratmağa davam etsə də, onların modernləşdirilməsi və yeni texnoloji həllərlə inteqrasiyası vacibdir. Bu çərçivədə elektron sənəd dövriyyəsi, ERP sistemlərinin təkmilləşdirilməsi və digər rəqəmsal həllərin tətbiqinin əhəmiyyəti vurğulanıb.
Sessiyada həmçinin layihələrin idarə olunmasında məlumatların əlçatanlığını artıran virtual məlumat otaqları (Virtual Data Room) kimi innovativ həllərdən danışılıb. Bildirilib ki, bu platformalar tərəfdaşlara layihələrlə bağlı məlumatları məsafədən və real vaxt rejimində araşdırmaq imkanı yaradır.
Məruzəçilər yataqların işlənməsi zamanı tətbiq olunan mühəndislik həllərinə də toxunublar. Qeyd olunub ki, quyuların stimullaşdırılması məqsədilə istifadə edilən turşu vurulması texnologiyaları hasilatın artırılmasında mühüm rol oynayır. Son illərdə bu prosesdə istifadə olunan turşuların tərkibinin təkmilləşdirilməsi nəticəsində daha yüksək effektivliyə nail olunub.
Sessiya çərçivəsində süni intellekt və rəqəmsal alətlərin sənayedə istifadəsi də müzakirə olunub. Bildirilib ki, süni intellekt məlumatların emalı və təhlili proseslərini sürətləndirsə də, neft-qaz sektorunda əsas uğurlar hələ də elmə, mühəndislik həllərinə və sınaqdan çıxmış texnologiyalara əsaslanır.
Aytac Kərimova | EDnews
.jpg)
.jpeg)
