ABŞ Prezidenti Donald Tramp Vaşinqton-Tehran münasibətlərində uzun illər davam edən böhranın nəticələrini aradan qaldırmaq niyyətindədir. Lakin bu prosesin uğuru Tehranın üzərinə götürdüyü öhdəlikləri yerinə yetirməyə hazır olmasından asılı olacaq.
EDnews xəbər verir ki, bunu ABŞ vitse-prezidenti Ceyms Devid Vens "CBS" telekanalına müsahibəsində bildirib.
Onun sözlərinə görə, Vaşinqton İranın əldə olunan razılaşmaları yerinə yetirməyə real hazırlıq nümayiş etdirəcəyinə ümid edir.
“Düşünürəm ki, Prezident ABŞ və İran arasında 47 il davam edən uğursuz münasibətlərin nəticələrini aradan qaldırmağa çalışır. Lakin bunun üçün İran tərəfi həqiqətən də razılaşmaların ona aid hissəsini yerinə yetirməlidir”, — deyə Vens vurğulayıb.
ABŞ vitse-prezidenti qeyd edib ki, əldə olunan razılaşma İran üçün beynəlxalq ictimaiyyətlə tam iqtisadi əməkdaşlığın bərpasına yol aça bilər.
“Razılaşma faktiki olaraq İrana əl uzadır və deyir: əgər siz öhdəliklərinizi yerinə yetirməyə və nüvə proqramınızla bağlı real yoxlamalara icazə verməyə hazırsınızsa, biz sizin dünya iqtisadiyyatına qayıdışınızı alqışlamağa hazırıq”, — deyə o bildirib.
Vens əlavə edib ki, prosesin bundan sonrakı inkişafı Tehranın konkret addımlarından və tərəflər arasında etimad səviyyəsindən asılı olacaq. Onun sözlərinə görə, Vaşinqton artıq bağlı qapılar arxasında mesaj ötürməklə kifayətlənmir, İran tərəfi ilə birbaşa dialoq aparır.
“Biz artıq İrana arxa kanallar vasitəsilə mesaj göndərmirik; biz əslində onlarla danışırıq. Biz İrana əl uzadırıq. Əgər onlar bizimlə münasibətlərini dəyişmək istəyirlərsə, biz də İranla münasibətlərimizi dəyişəcəyik. Təklifimiz bundan ibarətdir”, — deyə ABŞ vitse-prezidenti bildirib.
Aysel Hacıyeva | EDnews
