Rusiya tərəfindən təhlükə yaranacağı təqdirdə NATO Kalininqrad, Sankt-Peterburq, Kola yarımadası və Qara dəniz də daxil olmaqla, bir sıra strateji əhəmiyyətli regionlarda hərəkətə keçməyə hazır olacaq.
EDnews xəbər verir ki, bu barədə Almaniya Hərbi Hava Qüvvələrinin — Lüftvaffenin komandanı, general-leytenant Holger Noymann “The Telegraph”a müsahibəsində bildirib.
Onun sözlərinə görə, Şimali Atlantika Alyansının təhlükəsizliyi NATO ərazisinin bütün hissələrində istisnasız şəkildə təmin edilməlidir.
“Aydın olmalıdır ki, müxtəlif təhlükəsizlik səviyyəsinə malik zonalar yoxdur. NATO — son santimetrə qədər NATO-dur. Düşünürəm ki, biz təhlükəsizlik baxımından müşahidə aparmaq və zərurət yaranacağı təqdirdə müəyyən regionlarda hərəkətə keçmək üçün çox ciddi səylər göstərməliyik”, — deyə o bildirib.
Nəşrin qeyd etdiyinə görə, general-leytenant Kalininqrad, Sankt-Peterburq, Kola yarımadası və Qara dənizi alyansın təhlükə yaranacağı halda tədbir görə biləcəyi istiqamətlər kimi ayrıca qeyd edib.
Daha əvvəl Noymann Rusiyanın NATO üzvlərindən birinə hücum edəcəyi təqdirdə Almaniyanın “elə bu gecə” ona qarşı çıxmağa hazır olduğunu bəyan etmişdi. O vurğulayıb ki, Almaniya qüvvələri Şimali Atlantika Alyansının ərazisinin hər qarışını müdafiə etməyə hazırdır.
Lüftvaffe komandanının sözlərinə görə, NATO üzvü olan ölkəyə hücum baş verərsə, alyansın cavabı aviasiyanın tətbiqini və Rusiyanın hərbi obyektlərinə güclü zərbələrin endirilməsini də əhatə edəcək.
Aysel Hacıyeva | EDnews
