Xəbər verdiyimiz kimi, Ermənistanın ikinci prezidenti Robert Köçəryanın ölkədən çıxmasının qarşısı alınıb. Zvartnots hava limanındakı hüquq-mühafizə orqanlarının əməkdaşları onun Ermənistan ərazisini tərk etməsinə icazə verməyiblər.
Politoloq Rəşad Bayramov EDnews-a açıqlamasında bildirib ki, Robert Köçəryanın ölkədən çıxışına qadağa qoyulacağı əvvəlcədən də məlum idi.
Onun sözlərinə görə, Nikol Paşinyan istər seçkiqabağı çıxışlarında, istərsə də seçkilərdən sonra Qaqik Sarukyan, Robert Köçəryan və Samvel Karapetyanla bağlı cinayət işlərinə başlanacağını açıqlamışdı.
Politoloqun fikrincə, Ermənistanda müxalifətin seçki nəticələri ilə bağlı kütləvi etiraz çağırışları etməsi və bu aksiyaların iğtişaşlara çevrilmə ehtimalı hakimiyyətin daha sərt addımlar atmasına səbəb olub.
Rəşad Bayramov qeyd edib ki, Sarukyan və Köçəryan həmin dövrdə ölkədən kənarda olmaqla özlərini mümkün siyasi risklərdən sığortalamağa çalışırdılar. Lakin bu plan baş tutmayıb. Əvvəl Sarukyan, daha sonra isə Köçəryan hava limanında saxlanılıb.
Politoloq Köçəryanın Azərbaycana təhvil verilməsi ehtimalına toxunaraq bildirib ki, bu məsələ yalnız iki ölkə arasındakı münasibətlərlə deyil, həm də beynəlxalq hüquq prinsipləri, ekstradisiya prosedurları və keçmiş yüksək vəzifəli şəxslərin hüquqi məsuliyyəti ilə bağlıdır.
Onun sözlərinə görə, Azərbaycan cəmiyyətində Robert Köçəryan ilk növbədə Xocalı faciəsinə görə məsuliyyət daşıyan siyasi və hərbi fiqurlardan biri kimi qəbul olunur və Azərbaycan tərəfi uzun illərdir məsul şəxslərin beynəlxalq hüquq çərçivəsində cavab verməsinin vacibliyini vurğulayır.
Rəşad Bayramov hesab edir ki, hüquqi baxımdan ekstradisiya prosesinin həyata keçirilməsi təkcə hüquqi əsaslarla deyil, eyni zamanda siyasi iradə ilə müəyyən olunur.
Politoloq vurğulayıb ki, Azərbaycan tərəfi nəzəri olaraq təhvil verilmə ilə bağlı müraciət edə bilər. Bununla belə, ekstradisiya tələbinin təmin olunması saxlanılmanın baş verdiyi ölkənin qanunvericiliyi, beynəlxalq öhdəlikləri və məhkəmə qərarlarından asılı olacaq.
Ekspert əlavə edib ki, Köçəryan Ermənistanda müharibə cinayətləri ilə bağlı saxlanılmayıb, onun ölkədən çıxışına qoyulan məhdudiyyət də bununla əlaqəli deyil.
Sonda Rəşad Bayramov bildirib ki, məsələ hüquqi prosedur olmaqla yanaşı diplomatik münasibətlər kontekstində də qiymətləndiriləcək və hazırkı şəraitdə belə bir ssenarinin reallaşması olduqca çətin görünür.
