“Azərbaycan demokratik cəmiyyətlərdə medianın rolu, süni intellekt, dezinformasiya və saxta xəbərlərin doğurduğu fəsadlarla bağlı qlobal müzakirələrdə getdikcə daha mühüm mövqeyə sahib olur. Şuşanın zəngin tarixi irsi və mədəni kimliyi bu qədim Azərbaycan şəhərini etibarlı medianın gücləndirilməsi və xalqlar arasında qarşılıqlı anlaşmanın inkişafı üçün ideal mərkəzə çevirir".
Bu fikirləri amerikalı siyasi şərhçi Peter Teyz IV Şuşa Qlobal Media Forumunda EDnews-a açıqlamasında bildirib:
“Dünya tarixində ilk dəfə olaraq tanınmış alimlər, akademiklər, media nümayəndələri və dövlət rəsmiləri "Həqiqət hər şeydən öncədir" prinsipini gücləndirmək məqsədilə Şuşada bir araya gəlirlər. Bu tədbirin məhz Şuşada keçirilməsi xüsusi rəmzi məna daşıyır. Çünki bu şəhər 30 ilə yaxın müddət ərzində yalnız işğaldan deyil, beynəlxalq medianın qərəzli və təhrif olunmuş yanaşmalarından da ciddi şəkildə əziyyət çəkib”- deyə siyasi şərhçi vurğulayıb.
Peter Teyz qeyd edib ki, bəzi aparıcı beynəlxalq media qurumlarının uzun illər ərzində yaydığı birtərəfli məlumatlar Azərbaycanın nüfuzuna ciddi zərər vurub. Buna baxmayaraq, Şuşa bu gün ədalətsizliyin külləri arasından yenidən yüksələrək qlobal dialoq və əməkdaşlıq mərkəzinə çevrilir.
“Urbisid, ekosid və soyqırımı siyasətinin ağır nəticələrini yaşamış Şuşa bu gün daha güclü xalqların, daha sülhsevər dünyanın və ədalətli informasiya mühitinin qurulmasının mümkün olduğunu nümayiş etdirir. Burada iqtisadi inkişafla dəqiq, obyektiv və məsuliyyətli xəbər yayımı arasında sağlam əlaqənin formalaşdırılması mümkündür”, - siyasi şərhçi söyləyib.
Peter Teyzin fikrincə, Prezident İlham Əliyevin rəhbərliyi ilə Azərbaycan strateji yanaşmaların və qlobal geosiyasi tendensiyaların ölkələrin və bütövlükdə regionların inkişafına real töhfə verə biləcəyini dünyaya nümayiş etdirib:
“Şuşa Qlobal Media Forumu tarixi hadisədir. Bu Forum Azərbaycanı və Şuşanı medianın gələcəyi, informasiya texnologiyalarının inkişafı və demokratik cəmiyyətlərdə dezinformasiyanın yaratdığı təhlükələrin müzakirə olunduğu qlobal mərkəzlərdən birinə çevirir”.
Amerikalı siyasi şərhçi Prezident İlham Əliyevlə keçirilən interaktiv dialoqun da xüsusi əhəmiyyət daşıdığını bildirib. Onun sözlərinə görə, real faktların saxta xəbərlərlə təhrif edildiyi, hibrid müharibənin təbliğat və informasiya savaşı ilə sıx bağlı olduğu müasir dövrdə belə dialoqlara böyük ehtiyac var.
Peter Teyz əlavə edib ki, Forum çərçivəsində müzakirə olunan əsas məsələlərdən biri də Azərbaycan ilə Amerika Birləşmiş Ştatları arasındakı münasibətlər olub:
“Azərbaycan-ABŞ münasibətləri yüksək səviyyədə inkişaf edir. Prezident Donald Tramp və Prezident İlham Əliyev iki ölkə arasındakı strateji tərəfdaşlığın və müttəfiqlik münasibətlərinin əsas memarları kimi çıxış edirlər”.
Aytac Kərimova | EDnews
