Son günlər paytaxtda və bölgələrdə baş verən yol-nəqliyyat hadisələrinin artması diqqət çəkən məqamlardandır.
Bəs, qəza hallarının çoxalmasına əsas səbəb nədir?
Mövzu ilə bağlı nəqliyyat məsələləri üzrə ekspert Elməddin Muradlı EDnews-a danışarkən qeyd edib ki, paytaxtda bəzən ard-arda bir neçə gün dəhşətli qəzaların şahidi olmaq mümkündür:
"Ağır yol-nəqliyyat hadisələrində insanlar həyatını itirir, xəsarət alanlar olur. Bu hallar, adətən, bayram günlərinə, rayonlara gediş-gəlişin intensivləşdiyi dövrlərə təsadüf edir. Lakin ən düzgün olan yol-nəqliyyat vasitəsini qanunlara uyğun idarə etməkdir. İstər motosiklet olsun, istər velosiped, avtomobil, avtobus və ya yük maşını fərq etmir. Əsas məsələ yol hərəkəti qaydalarını bilmək və onlara əməl etməkdir. Təəssüf ki, motosiklet sürənlərin bir çoxu bu nəqliyyat vasitəsinə oyuncaq kimi baxır. Onlara elə gəlir ki, bu, ikitəkərli vasitədir, qapısı, şüşəsi yoxdur, oturacağı da avtomobil kimi deyil. Buna görə də, motosikleti ciddi nəqliyyat vasitəsi kimi qəbul etmirlər".
Ekspert əlavə edib ki, motosiklet oyuncaq deyil, onun da yol hərəkəti haqqında qanunla tənzimlənən qaydaları var:
"Bəzən bu qaydalar unudulur. Nəqliyyat vasitəsi idarə edən bir çox insanlar yol hərəkəti qaydalarına laqeyd yanaşır, avtomobillə məsuliyyətsiz davranır. Bu baxımdan, aidiyyəti qurumlar tərəfindən nəzarət və profilaktik tədbirlər gücləndirilməlidir. Təbliğat işləri artırılmalı, cəza sanksiyalarına yenidən baxılmalıdır".
Qeyd edək ki, iyunun 16-da vəkil, beynəlxalq hüquq üzrə professor Fərhad Mehdiyevin qızı Zəhra Bakı-Sumqayıt yolunda baş verən yol-nəqliyyat hadisəsində həyatını itirib. Bu gün isə 19 yaşlı Fuad Babaşov idarə etdiyi “MİNSK D D4” markalı motosikletlə 4 yaşlı Atilla Bağırovu vurub. Hadisə nəticəsində azyaşlı dünyasını dəyişib.
Xatırladaq ki, Daxili İşlər Nazirliyinin 2025-ci il üzrə statistikasına əsasən, ötən il ölkədə 1252 yol-nəqliyyat hadisəsi baş verib. Hadisələr nəticəsində 689 nəfər həlak olub, 1026 nəfər isə yaralanıb.
Bununla yanaşı, 2026-cı ilin yanvar-mart aylarında Azərbaycanda baş verən yol-nəqliyyat hadisələri də narahatedici statistika ilə yadda qalıb. Belə ki, ilin ilk üç ayında ölkədə 252 yol-nəqliyyat hadisəsi qeydə alınıb. Bu hadisələr nəticəsində 319 nəfər zərər çəkib. Onlardan 140 nəfər həlak olub, 179 nəfər isə yaralanıb.
Aytac Kərimova | EDnews
