“Apple” şirkətinin OLED ekranla təchiz olunacaq yeni nəsil “iPad mini” planşetini 2026-cı ilin sonlarında təqdim edə biləcəyi bildirilir.
EDnews “MacRumors” nəşrinə istinadən xəbər verir ki, “Bloomberg”in jurnalisti Mark Qurmanın məlumatına əsasən, yeni modelin payız aylarında, ehtimal ki, oktyabrda təqdim olunması gözlənilir. Lakin şirkət hələlik cihazın təqdimat tarixini rəsmən açıqlamayıb.
Yeni “iPad mini”də mövcud LCD ekranın OLED panellə əvəzlənəcəyi bildirilir. Bu dəyişiklik daha dərin qara rənglərin, yüksək kontrastın və daha keyfiyyətli görüntünün əldə olunmasına imkan verə bilər. OLED ekranın tətbiqi cihazın enerji səmərəliliyini də yaxşılaşdıra bilər.
Bununla yanaşı, daha bahalı ekran texnologiyasının planşetin satış qiymətinə təsir göstərəcəyi gözlənilir. Məlumatlara görə, yeni model hazırkı versiyadan təxminən 100 dollar və ya daha çox baha ola bilər. (MacRumors)
Yeni nəsil planşetin vibrasiya texnologiyasına əsaslanan dinamik sistemi və təkmilləşdirilmiş suya davamlı korpusla təchiz ediləcəyi də iddia olunur. Ənənəvi dinamik dəliklərinin aradan qaldırılması cihazın nəmdən daha yaxşı qorunmasına kömək edə bilər.
Prosessorla bağlı məlumatlarda isə yeni “iPad mini”nin A19 Pro və ya A20 Pro çipi ilə təchiz oluna biləcəyi qeyd edilir.
Xatırladaq ki, hazırkı “iPad mini” modeli 2024-cü ilin oktyabrında təqdim edilib. Planşet 8,3 düymlük “Liquid Retina” ekran, A17 Pro prosessoru və “Apple Intelligence” dəstəyi ilə təchiz olunub.
