Ceyhun Bayramovun Moskvaya səfəri və Lavrovla görüşü Azərbaycan-Rusiya münasibətlərini diplomatik kanallar vasitəsilə müzakirəsi baxımından mühüm əhəmiyyət daşıyır.
Politoloq Rəşad Bayramov EDnews-a açıqlamasında bildirib ki, səfər son dövrdə Bakı ilə Moskva arasında müəyyən fikir ayrılıqlarının müşahidə olunduğu bir dövrə təsadüf edir.
Onun sözlərinə görə, görüşün əsas məqsədi münasibətlərdə yaranmış suallara aydınlıq gətirmək, qarşılıqlı maraq doğuran məsələləri müzakirə etmək və dialoq mexanizmlərini işlək vəziyyətdə saxlamaqdır.
Ekspert vurğulayıb ki, Azərbaycanın xarici siyasətinin əsas prinsiplərindən biri bütün dövlətlərlə milli maraqlara əsaslanan balanslı münasibətlərin qorunmasıdır.
Onun fikrincə, Rusiya Azərbaycan üçün iqtisadi, humanitar və nəqliyyat sahələrində mühüm tərəfdaş olaraq qalır. Bununla yanaşı, Azərbaycan beynəlxalq hüququn prinsiplərini, xüsusilə dövlətlərin ərazi bütövlüyü və suverenliyini xarici siyasətinin əsas dayaqlarından biri hesab edir.
Rəşad Bayramov qeyd edib ki, Prezident İlham Əliyevin Şuşa Qlobal Media Forumundakı çıxışı da bu baxımdan xüsusi əhəmiyyət kəsb edir. Dövlət başçısı Ukraynanın ərazi bütövlüyünə dəstəyi bir daha ifadə edərək, işğal faktı ilə barışmağın mümkün olmadığını və münaqişələrin beynəlxalq hüquq çərçivəsində ədalətli şəkildə həll edilməsinin vacibliyini vurğulayıb.
Politoloqun sözlərinə görə, bu mövqe Azərbaycanın Qarabağ məsələsində uzun illər müdafiə etdiyi prinsipial yanaşmanın məntiqi davamıdır.
Onun fikrincə, məhz bu kontekstdə Ceyhun Bayramovun Moskva səfəri Azərbaycanın diplomatik kanallar vasitəsilə milli maraqlarını qorumaq strategiyasının davamı kimi qiymətləndirilməlidir. Dövlətlərarası münasibətlərdə fikir ayrılıqlarının olması dialoqun dayandırılması deyil, əksinə, daha intensiv diplomatik təmasların aparılmasını zəruri edir.
Politoloq hesab edir ki, görüş zamanı Azərbaycan-Rusiya münasibətlərinin hazırkı vəziyyəti ilə yanaşı, regional təhlükəsizlik məsələləri, Cənubi Qafqazda sülh prosesi, Ermənistanla Azərbaycan arasında normallaşma gündəliyi, nəqliyyat-kommunikasiya layihələri və iqtisadi əməkdaşlıq müzakirə olunacaq.
Bundan əlavə, Rusiya-Ukrayna müharibəsinin regional proseslərə təsiri və Rusiyanın Ukrayna ərazisində Azərbaycana məxsus obyektlərin zərər görməsi ilə bağlı məsələlərin də gündəmə gəlməsi ehtimal olunur.
Rəşad Bayramov sonda bildirib ki, bu səfəri yalnız ikitərəfli münasibətlər çərçivəsində qiymətləndirmək doğru olmaz. Onun sözlərinə görə, bu görüş daha geniş regional və qlobal proseslər fonunda Azərbaycanın öz mövqeyini çatdırması, qarşılıqlı maraqları qoruması və mürəkkəb geosiyasi şəraitdə diplomatik manevr imkanlarını saxlaması baxımından mühüm platformadır.
