Azərbaycanın Xalq şairi Sabir Rüstəmxanlının 80 illiyinə həsr olunmuş yubiley gecəsi keçirilib.
EDnews xəbər verir ki, mərasim Azərbaycan Dövlət Akademik Milli Dram Teatrında baş tutub.
Yubiley gecəsində mədəniyyət naziri Adil Kərimli, baş nazirin müavini Samir Şərifov, ölkənin mədəniyyət, incəsənət və ictimai-siyasi xadimləri, millət vəkilləri, şairin ailə üzvləri və dostları iştirak edib.
Tədbir şairin həyat və yaradıcılığından bəhs edən videoçarxla başlayıb. Ardınca yubiley gecəsində Sabir Rüstəmxanlının zəngin ədəbi irsi və ictimai fəaliyyəti ilə bağlı çıxışlar səsləndirilib.
Baş nazirin müavini Samir Şərifov çıxışında Sabir Rüstəmxanlının Azərbaycan ədəbiyyatında və ictimai fikir tarixində özünəməxsus yer tutduğunu bildirib. O qeyd edib ki, şairin yaradıcılığı hər zaman milli ruhun, vətən sevgisinin və azadlıq ideyalarının ifadəsi olub:
“Sabir Rüstəmxanlı təkcə şair kimi deyil, həm də ictimai-siyasi xadim olaraq ölkənin ictimai həyatında fəal iştirak edib, dövlətçilik və milli həmrəylik istiqamətində mühüm fəaliyyət göstərib”.
O daha sonra Baş nazir Əli Əsədovun yubiley məktubunu da səsləndirilib.
Məktubda qeyd olunub ki, Sabir Rüstəmxanlı uzun illər ərzində zəngin yaradıcılığı ilə Azərbaycan ədəbiyyatına dəyərli töhfələr verib, ictimai-siyasi fəaliyyəti ilə ölkənin həyatında yaxından iştirak edib. Bildirilib ki, o, uzun illər Milli Məclisin deputatı kimi fəal vətəndaş mövqeyi nümayiş etdirərək dövlətçiliyə xidmət göstərib.
Təbrik məktubunda Sabir Rüstəmxanlının yaradıcılığının xalqın tarixi yaddaşını yaşatdığı, milli-mənəvi dəyərləri və azadlıq ideallarını tərənnüm etdiyi vurğulanıb. Eyni zamanda onun dünya azərbaycanlılarının həmrəyliyi və milli birlik ideyalarının təbliğində mühüm rol oynadığı qeyd edilib. Baş nazir Əli Əsədov məktubun sonunda yubilyara möhkəm cansağlığı, yeni yaradıcılıq uğurları və uzun ömür arzulayıb.
Azərbaycan Milli Elmlər Akademiyasının prezidenti İsa Həbibbəyli çıxışında bildirib ki, Sabir Rüstəmxanlı çağdaş Azərbaycan ədəbiyyatının görkəmli nümayəndələrindən biridir:
“Şair həm yaradıcılığı, həm də vətəndaş mövqeyi ilə cəmiyyətdə böyük nüfuz qazanıb. O, zəhmətkeş ailədə böyüyüb, uşaqlıq və gənclik illərində kənd həyatının çətinliklərini yaxından görüb. Bu həyat təcrübəsi sonradan onun yaradıcılığında da öz əksini tapıb, əsərlərinə xalq ruhu və milli düşüncə gətirib. Sabir Rüstəmxanlı yaradıcılığında azərbaycançılıq ideyasına daim sadiq qalıb. O, Cəlil Məmmədquluzadə ənənələrindən gələn milli düşüncə xəttini müasir dövrün ictimai-siyasi və ədəbi mühitində davam etdirərək, həm əsərləri, həm də fəaliyyəti ilə bu ideologiyanın inkişafına töhfə verib”.
Azərbaycan Yazıçılar Birliyinin üzvü Səlim Babullaoğlu çıxışında bildirib ki, Sabir Rüstəmxanlının 80 illik yubileyi münasibətilə müxtəlif türk dövlətlərindən və beynəlxalq təşkilatlardan təbrik məktubları ünvanlanıb.
Qeyd olunub ki, Qazaxıstan, Özbəkistan, Qırğızıstan, Tatarıstan və digər bölgələrdən olan yazıçı və ictimai xadimlər yubilyarı təbrik edərək onun türk dünyası ədəbiyyatına verdiyi töhfələri yüksək qiymətləndiriblər.
Türkiyəli yazıçı İmdat Avşar çıxışında vurğulayıb ki, böyük sənətkarların yaradıcılığı zaman keçdikcə bir-birini tamamlayan halqalar kimi genişlənir. Onun sözlərinə görə, Sabir Rüstəmxanlının əsərləri də məhz belə bir bütöv düşüncə sistemini formalaşdırır:
“Sabir Rüstəmxanlı yaradıcılığında yalnız Azərbaycana deyil, bütövlükdə Türk dünyasına xitab edən ideyalar yer alır. Yazıçının əsərləri bir-biri ilə iç-içə keçərək daha böyük məna dairəsi yaradır və bu yaradıcılıq sərhədləri aşaraq müxtəlif coğrafiyalarda oxuculara təsir göstərir. Sabir Rüstəmxanlının əsas fərqi onun illər boyu eyni ideya və amal xəttinə sadiq qalmasıdır. O, həm yaradıcılıqda, həm də ictimai düşüncədə milli kimlik və mənəvi bağlılıq mövzusunu davamlı şəkildə qoruyub saxlayıb”.
Sonda çıxış edən Xalq şairi Sabir Rüstəmxanlı yubiley gecəsinin təşkilinə görə təşəkkürünü bildirib, illər ərzində yaradıcılığına və ictimai fəaliyyətinə göstərilən diqqəti yüksək qiymətləndirdiyini deyib:
“Bizim bütün tariximiz belədir. Qərbə bir səhnə dayanır, biz gedirik, növbəti nəsil, nəvələr gəlir. Dünyanın gözəllikləri də elə bundadır. Mən hamınıza təşəkkür etmək istəyirəm. Burada çıxış edənlərin hər birinə, mənim haqqımda, keçdiyim yollar haqqında ürəklə danışan qələm dostlarıma, gənclik dostlarıma, Türkiyədən, Moskvadan gələn dostlarıma, bu səhnəni bəzəyən aktyorlara xüsusi minnətdarlığımı bildirirəm.
Bu gecənin təşkili, əlbəttə ki, asan məsələ deyildi. Hamımız bilirik ki, belə tədbirlərin ərsəyə gəlməsi böyük zəhmət tələb edir. Buna baxmayaraq, bu çətin hava şərtləri içində bura gələn hər bir insan mənim üçün doğmadır, əzizdir. Hamınıza təşəkkür edirəm, var olun.
Elə hadisələr var ki, insan ömründə bir dəfə yaşanır. 80 yaş da həmin məqamlardan biridir”.
Tədbirdə həmçinin Sabir Rüstəmxanlının şeirləri səsləndirilib. Yubiley gecəsində musiqi nömrələri təqdim olunub.
Qeyd edək ki, Sabir Rüstəmxanlı 1946-cı il mayın 20-də Yardımlı rayonunda anadan olub. O, 2005-ci ildə Xalq şairi adına layiq görülüb. Şair 2021-ci ildə “Şöhrət”, bu il isə “Şərəf” ordeni ilə təltif olunub.
