Azərbaycanın xarici işlər naziri Ceyhun Bayramovun Rusiyaya gözlənilən səfəri iki ölkə arasında son dövrlərdə yaranmış gərginlik fonunda xüsusi əhəmiyyət daşıyır. Lakin bir o qədər də səfər çərçivəsində müzakirə olunacaq məsələlər də predmetdir. Bu isə, öz növbəsində, sual doğurur:
Görüş zamanı hansı məsələlər masaya çıxarılacaq?
Belə bir səfər Azərbaycan-Rusiya münasibətlərində gərginliyin azalmasına və normallaşma prosesinin sürətlənməsinə təsir göstərə bilərmi?
Mövzu ilə bağlı EDnews-a danışan politoloq Elçin Xalidbəyli qeyd edib ki, hazırda Azərbaycan və Rusiya arasındakı münasibətlərdə müəyyən problemlərin və gərginliyin mövcud olduğu danılmaz reallıqdır. Bu baxımdan, Azərbaycanın xarici işlər naziri Ceyhun Bayramovun Rusiyaya səfəri böyük əhəmiyyət daşıyır:
.jpg)
"Belə bir səfər Azərbaycan-Rusiya münasibətlərinin yenidən normal məcraya qaytarılması istiqamətində atılmış mühüm addım kimi qiymətləndirilə bilər. Səfər münasibətlərdəki gərginliyin azalmasına və normallaşma prosesinin ön plana keçməsinə birbaşa təsir göstərə bilər. Məsələ ondadır ki, AZAL-a məxsus sərnişin təyyarəsinin Rusiya səmasında vurulması ilə bağlı məsələ hələ də tam həllini tapmayıb. Hər iki ölkə bu istiqamətdə müəyyən addımlar atsa da, proses yekunlaşmayıb".
Siyasi şərhçi vurğulayıb ki, səfər zamanı təyyarə qəzası ilə bağlı məsələnin səfər çərçivəsində müzakirə olunması mümkündür:
"Digər tərəfdən, son dövrlərdə Azərbaycanın Ukrayna ərazisindəki enerji obyektlərinin Rusiya Silahlı Qüvvələrinin raket zərbələrinə məruz qalması da ikitərəfli münasibətlərə mənfi təsir göstərir. Vaxtilə Azərbaycanın Ukraynadakı səfirliyinin yaxınlığına raket zərbəsinin endirilməsi, SOCAR-a məxsus yanacaqdoldurma məntəqələrinin hədəfə alınması, eləcə də son günlər baş verən analoji hadisələrin iki ölkənin diplomatları arasında ciddi şəkildə müzakirə ediləcəyi gözlənilir. Bütün bunlarla yanaşı, böyük ehtimalla Azərbaycan və Rusiya xarici işlər nazirləri Cənubi Qafqazda gedən geosiyasi, geostrateji və geoiqtisadi proseslər ətrafında da geniş fikir mübadiləsi aparacaqlar. Xüsusilə TRIPP layihəsinin reallaşdırılması, eləcə də Rusiya ilə İran arasında nəqliyyat-kommunikasiya əlaqələrinin Azərbaycan ərazisi üzərindən təmin olunması kimi mühüm məsələlərin müzakirə ediləcəyi şübhə doğurmur".
Xatırladaq ki, Azərbaycan xarici işlər naziri Ceyhun Bayramovun bu ay Moskvaya işgüzar səfəri gözlənilir.
Aytac Kərimova | EDnews
.jpeg)
