İsrail mətbuatı Türkiyə Prezidenti Rəcəb Tayyib Ərdoğan və ABŞ Prezidenti Donald Trampla bağlı diqqətçəkən iddia irəli sürüb.
EDnews xəbər verir ki, İsrailin bəzi media orqanlarında yayılan məlumatlara görə, Ağ Evdə İran əleyhinə fəaliyyət göstərən kürd qruplarının və İran müxalifətinin silahlandırılmasını nəzərdə tutan plan müzakirə olunub.
İddialara əsasən, həmin plan sonradan Türkiyə tərəfinə sızdırılıb və Prezident Rəcəb Tayyib Ərdoğan məsələ ilə bağlı ABŞ Prezidenti Donald Trampla danışıqlar apararaq onun həyata keçirilməsinin qarşısını alıb.
Xəbərdə qeyd olunur ki, sözügedən plan İran rejimininə qarşı təzyiq vasitəsi kimi nəzərdə tutulurdu və İraqdakı bəzi kürd qruplarının da prosesə cəlb edilməsi planlaşdırılırdı.
İsrailin “Jerusalem Post” nəşrinin təhlükəsizlik mənbələrinə istinadən yaydığı məlumata görə, İsrail bu təşəbbüsün ABŞ qoşunlarının birbaşa İrana müdaxilə ehtiyacını azalda biləcəyini düşünərək Vaşinqtonun dəstəyini qazanmağa çalışıb.
Məlumatda həmçinin iddia olunur ki, Ağ Evdəki bəzi rəsmilər planın detalları barədə Türkiyə tərəfini məlumatlandırıb. Bundan sonra Prezident Ərdoğanın ABŞ administrasiyası ilə təmaslara başladığı və Donald Trampı planın region üçün mümkün riskləri barədə inandıra bildiyi vurğulanır.
Lakin nə ABŞ, nə Türkiyə, nə də İsrail rəsmiləri sözügedən iddialarla bağlı hələlik rəsmi açıqlama verməyiblər.
Aytac Kərimova | EDnews







