Mərkəzi Kəşfiyyat İdarəsinin (MKİ) sabiq direktoru Con Brennan (ABŞ-ın 44-cü prezidenti Barak Obama dövründə bu vəzifəni tutub - red.) Konqresə yalan ifadə verməkdə ittiham olunur.
“EDnews” xəbər verir ki, bu barədə "Breitbart News" portalı yazır.
Daha əvvəl "New York Post" qəzeti MKİ-nin Analiz direktorluğunun hesabatını dərc edib. Hesabatda göstərilir ki, 2016-cı ildə ABŞ seçkilərinə Rusiyanın güman edilən müdaxiləsi haqqında məruzə çoxsaylı prosedur pozuntuları ilə tərtib edilib və siyasi motiv daşıya bilər. Sözügedən sənəddə digər məsələlərlə yanaşı qeyd edilir ki, Brennanın təşəbbüsü ilə vəziyyətin qiymətləndirilməsinə "Stilin dosyesi" (Böyük Britaniya xüsusi xidmət orqanlarının əməkdaşı Kristofer Stilin adı ilə əlaqədardır - red.) daxil edilib. Bu dosye 2016-cı il seçki kampaniyası zamanı Amerika mətbuatı tərəfindən dərc edilb. Burada Rusiya ilə o zaman ABŞ prezidentliyinə namizəd olan, hazırkı prezident Tramp arasında sövdələşmə barədə bilərəkdən yalan iddialar irəli sürülürdü. Dosyenin tərtibatı ilə amerikan şirkəti "Fusion GPS", həmçinin Kristofer Stil və onun London şirkəti məşğul olub. Brennan isə kəşfiyyat idarəsinin kadr əməkdaşlarının rəyini nəzərə almayaraq, bu dosyenin yekun hesabata daxil edilməsində israr edib. Lakin ABŞ Konqresinin üzvləri ilə bağlı qapılar arxasında keçirilən iclaslarda MKİ-nin keçmiş rəhbəri əksini iddia edib.
"Breitbart News" Konqresdəki mənbəyə istinadən bildirir ki, orada Brennanın hesabatından və onun "soyuqqanlılıqla Konqresə yalan deməsindən şoka düşüblər".
