Bu ilin yanvar-aprel aylarında Azərbaycanda külək elektrik stansiyalarında elektrik enerjisi istehsalı 58 dəfədən çox artıb.
EDnews xəbər verir ki, bu barədə Dövlət Statistika Komitəsi məlumat yayıb.
Məlumata görə, bu ilin yanvar-aprel aylarında Azərbaycanda külək elektrik stansiyalarında 327,5 milyon kVt/saat elektrik enerjisi istehsal edilib. Bu göstərici 2025-ci ilin eyni dövrü ilə müqayisədə 58,5 dəfə çoxdur.
Hesabat dövründə günəş elektrik stansiyalarında 121,8 milyon kVt/saat elektrik enerjisi istehsal olunub. Bu isə 2025-ci ilin yanvar-aprel ayları ilə müqayisədə 6 faiz azdır.
Bu ilin ilk dörd ayında ölkədə ümumilikdə 8 milyard 527,6 milyon kVt/saat elektrik enerjisi istehsal edilib. Bu göstərici ötən ilin eyni dövrü ilə müqayisədə 3 faiz azdır.
İstehsal olunan elektrik enerjisinin 8 milyard 273,6 milyon kVt/saatı əmtəəlik elektrik enerjisinin payına düşüb ki, bu da illik müqayisədə 2,5 faiz azalma deməkdir.
Hesabat dövründə su elektrik stansiyalarında 920 milyon kVt/saat elektrik enerjisi istehsal olunub və bu göstərici illik müqayisədə 13,5 faiz azalıb. İstilik elektrik stansiyalarında isə 6 milyard 816,9 milyon kVt/saat elektrik enerjisi istehsal edilib ki, bu da 5,5 faiz azdır.
Biokütlə və tullantıların yandırılmasından alınan elektrik enerjisinin həcmi isə 87,4 milyon kVt/saat təşkil edib. Bu istiqamətdə istehsal illik müqayisədə 17,7 faiz artıb.
