Azərbaycanın beynəlxalq diplomatik mərkəz kimi mövqeyi daha bir nüfuzlu tədbirə uğurla ev sahibliyi etməklə təsdiqləndi. Bakıda keçirilən İslam Əməkdaşlıq Təşkilatına üzv dövlətlərin Parlament İttifaqının 20-ci Sessiyası parlamentlərarası əməkdaşlığın inkişafı baxımından, eləcə də İslam dünyasının qarşısında duran aktual çağırışlara vahid yanaşmanın formalaşdırılması nöqteyi-nəzərindən mühüm hadisədir. Sessiyanın Bakıda keçirilməsi Azərbaycanın islam həmrəyliyinin gücləndirilməsi istiqamətində həyata keçirdiyi ardıcıl siyasətə verilən yüksək qiymətin ifadəsidir.
Cənab Prezidentin sessiyanın iştirakçılarına ünvanladığı müraciətdə də qeyd olunduğu kimi, “Azərbaycanın İslam Əməkdaşlıq Təşkilatına üzv olmasından 35 il ötür. Qürurla qeyd edə bilərik ki, bu illər ərzində ölkəmiz İslam həmrəyliyinin gücləndirilməsinə töhfə vermiş, İƏT-in fəaliyyətində təşəbbüskar və məsuliyyətli rol oynamış, məqsəd və prinsiplərinə sadiq qalmış, beynəlxalq müstəvidə nüfuzunun artırılmasında fəal iştirak etmişdir. “
Son illərdə Azərbaycan beynəlxalq dialoq, sivilizasiyalararası əməkdaşlıq və çoxtərəfli diplomatiyanın təşviqi sahəsində mühüm təşəbbüslərlə çıxış edir. Bakı artıq qlobal siyasi, iqtisadi və humanitar platformaların görüş məkanına çevrilib. Yubiley xarakteri daşıyan 20-ci Sessiyanın məhz Azərbaycanda keçirilməsi ölkəmizin İslam dünyasında artan nüfuzunun və etibarlı tərəfdaş statusunun göstəricisidir.
Sessiya çərçivəsində parlament diplomatiyasının imkanlarının genişləndirilməsi, üzv dövlətlər arasında siyasi dialoqun dərinləşdirilməsi, iqtisadi əməkdaşlıq, davamlı inkişaf, mədəni irsin qorunması, humanitar məsələlər və regional təhlükəsizlik mövzuları geniş müzakirə edildi. Müasir dövrdə qlobal siyasi proseslərin mürəkkəbləşdiyi, beynəlxalq hüququn selektiv tətbiqi hallarının artdığı bir şəraitdə İslam ölkələrinin vahid mövqedən çıxış etməsi xüsusi əhəmiyyət daşıyır. Bu baxımdan Bakı sessiyası üzv ölkələrin ortaq maraqlarının müdafiəsi üçün parlamentlərarası koordinasiyanın gücləndirilməsinə mühüm töhfə verdi.
Tədbirin mühüm nəticələrindən biri də parlament diplomatiyasının beynəlxalq münasibətlər sistemində rolunun artırılması ilə bağlı çağırışların səsləndirilməsi oldu. Dövlətlərarası münasibətlərdə parlamentlərin fəal iştirakı qarşılıqlı etimadın möhkəmlənməsinə, xalqlar arasında əlaqələrin inkişafına və münaqişələrin siyasi dialoq yolu ilə həllinə əlavə imkanlar yaradır. Bakı sessiyası bu baxımdan parlament diplomatiyasının effektiv platforma olduğunu bir daha nümayiş etdirdi.
Sessiyada müzakirə olunan əsas məsələlərdən biri də müsəlman ölkələrinin qarşılaşdığı təhlükəsizlik və humanitar problemlər idi. Xüsusilə bəzi regionlarda davam edən münaqişələr, humanitar böhranlar, qaçqın və məcburi köçkün problemləri, islamofobiya və ayrı-seçkilik meyillərinə qarşı mübarizə məsələləri diqqət mərkəzində saxlanıldı. Bu problemlərə münasibətdə ortaq yanaşmaların formalaşdırılması İslam həmrəyliyinin gücləndirilməsi baxımından mühüm əhəmiyyət kəsb edir.
Azərbaycan üçün sessiyanın xüsusi əhəmiyyəti həm də ölkəmizin 44 günlük Vətən müharibəsindən sonra regionda yaranmış yeni reallıqların, sülh gündəliyinin və bərpa-quruculuq prosesinin bu platforma vasitəsilə dünyaya çatdırılması ilə bağlıdır. Bakı platforması Azərbaycanın beynəlxalq hüquqa əsaslanan mövqeyinin daha geniş auditoriyaya təqdim olunmasına əlavə imkan yaratdı.
Sözügedən sessiya həmçinin Azərbaycanın beynəlxalq tədbirlərə uğurla ev sahibliyi etmək potensialını bir daha nümayiş etdirdi. Son illərdə COP29, Ümumdünya Şəhərsalma Forumu, İslam İnkişaf Bankının İllik Toplantıları və digər nüfuzlu beynəlxalq tədbirlərin Bakıda keçirilməsi ölkəmizin qlobal əməkdaşlıq məkanı kimi rolunu daha da gücləndirib.
Bakı Sessiyası İslam dünyasında parlament diplomatiyasının inkişafına təkan verdi, üzv dövlətlər arasında həmrəyliyin möhkəmlənməsinə xidmət etdi və Azərbaycanın beynəlxalq nüfuzunun daha da artdığını təsdiqlədi. Bu tədbir bir daha göstərdi ki, Azərbaycan bütövlükdə İslam coğrafiyasında dialoq, əməkdaşlıq və qarşılıqlı etimadın təşviqində mühüm rol oynayan dövlətlərdən biridir.
2027-ci ildə Azərbaycanda İslam Zirvə Konfransının 16-cı Sessiyası keçiriləcək və ölkəmiz İƏT-də Sədrliyi öz üzərinə götürəcək. Azərbaycan Prezidenti bəyan edib ki, “sədrliyimiz dövründə üzv dövlətlərin ümumi maraqlarının təşviqi, təşkilat çərçivəsində əməkdaşlığın dərinləşməsi, İslam həmrəyliyinin möhkəmləndirilməsi və böyük gücə çevrilməsi məqsədilə birgə səylərin səfərbər olunması üçün əlimizdən gələni əsirgəməyəcəyik.”
