"Azərbaycan Prezidentinin köməkçisi Hikmət Hacıyev öz açıqlamasında bir daha ictimaiyyətin və beynəlxalq birliyin diqqətini erməni terrorçuları tərəfindən Azərbaycan ərazilərində yaradılmış mina probleminə yönəltdi".
Millət vəkili Hikmət Babaoğlu bunu EDnews-a açıqlamasında deyib.
O, bildirib ki, faktiki olaraq, müharibə başa çatsa da, ölkəmizdə Ermənistanın Azərbaycana qarşı yaratdığı mina təhlükəsi hələ də davam edir:
"Əgər bu gün Azərbaycanın dinc vətəndaşları mina partlayışları nəticəsində həyatını itirir, yaxud əlil olurlarsa, bu, müharibənin fərqli formada davam etməsi deməkdir. Ona görə də hesab edirəm ki, hələ də gec deyil. Ermənistan tərəfi minalanmış ərazilərin xəritələrinin təqdim olunması istiqamətində real və konkret addımlar atmalıdır. Digər tərəfdən, bu terrorun dünya ictimaiyyətinin diqqətinə bir daha çatdırılması və beynəlxalq aktorların bu məsələdə öz məsuliyyətini dərk etməsi vacibdir".
Deputatın qənaətincə, bütün bunlara baxmayaraq, Azərbaycanın humanist davranışı və sülhdə israr etməsi fonunda mina terrorunu qiymətləndirərkən Azərbaycanla Ermənistan arasındakı fərq bir daha aydın görünür:
"Belə olan halda, Ermənistanın seçki kampaniyasında radikal daşnak qüvvələrinin Azərbaycana qarşı səsləndirdiyi revanşist fikirlərin nə qədər əsassız, ölçüsüz və qeyri-etik olduğu da üzə çıxır. Əgər mina terroru hələ də aktualdırsa, müharibənin nəticələri bu formada davam edirsə, şübhəsiz ki, bu amil sülh prosesinə də təsirsiz ötüşməyə bilər. Bu baxımdan, Azərbaycan ictimaiyyəti ərazilərimizin minalardan təmizlənməsi istiqamətində görülən işləri yüksək qiymətləndirir. Lakin, əlbəttə ki, erməni terrorunun bu acı təzahürünü də heç vaxt unutmayacağıq".
Aytac Kərimova | EDnews
