Azərbaycanda yenilənmiş 100 manatlıq pul nişanı tədavülə buraxılacaq.
EDnews xəbər verir ki, Azərbaycan Mərkəzi Bankı iyulun 15-dən etibarən yenilənmiş 100 manatlıq kağız pul nişanını dövriyyəyə buraxacaq.
Məlumata görə, yenilənmə beynəlxalq təcrübəyə uyğun olaraq pul nişanlarının saxtalaşdırılmasına qarşı mübarizənin gücləndirilməsi və ən son texnologiyaların tətbiqi məqsədi daşıyır. Bildirilib ki, 2021-ci ildən etibarən artıq 1, 5, 10, 20 və 50 manatlıq əsginaslar da yenilənmiş formada tədavülə buraxılıb.
Qeyd olunub ki, “İqtisadiyyat və İnkişaf” mövzusuna həsr olunan yeni 100 manatlıqda müasir mühafizə elementləri tətbiq edilib. Bunlara rəngi dəyişən holoqram, “Spark Flow Prime” effekti, su nişanı, görmə qüsuru olanlar üçün xüsusi qabarıq xətlər, şaquli dizayn, mühafizə sapı və mikromətnlər daxildir.
Bildirilib ki, pul nişanının üzərində AMB-nin sədri Taleh Kazımovun imzası yer alır.
Hazırda ölkədə istifadə olunan nağd pul sistemlərinin yeni əsginasa uyğunlaşdırılması prosesi aparılır.
Qeyd edək ki, yenilənmiş 100 manatlıq hazırda dövriyyədə olan eyni nominallı pul nişanları ilə paralel şəkildə istifadə olunacaq və tədavül vasitəsi kimi məhdudiyyətsiz qüvvədə qalacaq.
