Qulaqcıqlardan yüksək səslə istifadə, avtomobilin pəncərəsini açıq saxlayaraq sürətli yolda hərəkət etmək, eləcə də bağ və təmir alətləri ilə işləmək də qulaqlara qalıcı zərər vura bilər.
EDnews xəbər verir ki, bu barədə "BBC" məlumat yayıb.
Klivlend Klinikasının audioloqu Valeri Pavloviç Ruff bildirib ki, eşitmə qabiliyyəti itirildikdən sonra bərpa olunmur.
“Bir dəfə itdisə, geri qayıtmır”- deyə mütəxəssis vurğulayıb.
Audioloqlar son illərdə eşitmə problemlərinin yeniyetmələrdə və hətta 10 yaşdan kiçik uşaqlarda da artdığını bildirirlər. Bunun əsas səbəblərindən biri uzun müddət yüksək səslə musiqi dinləməkdir.
Daxili qulaqda səsi beyinə ötürən minlərlə həssas tük hüceyrəsi yerləşir. Yüksək səs bu hüceyrələri zədələyir və onlar yenidən bərpa olunmur.
Mütəxəssislər konsert və stadionlarda xüsusi qulaq tıxaclarından istifadə etməyi, qulaqcıqların səsini təhlükəsiz həddə saxlamağı tövsiyə edirlər. Əgər qulaqcıq taxarkən yaxınlıqdakı şəxsin səsini eşitmək mümkün deyilsə, səs səviyyəsi həddindən artıq yüksəkdir.
Otbiçən, mişar, yarpaqüfürən və digər səs-küylü alətlərlə işləyərkən də qoruyucu qulaqlıq və ya qulaq tıxacından istifadə vacibdir.
Sürətli yolda avtomobilin pəncərəsini açıq saxlamaq da bir qulaqda eşitmə itkisinə səbəb ola bilər. Külək səsi ilə yanaşı, radionun səsinin yüksəldilməsi riski daha da artırır.
Mütəxəssislər qulaqda küy, cingilti və ya səs-küylü mühitdə danışığı anlamaqda çətinlik yarandıqda eşitmə müayinəsindən keçməyi məsləhət görürlər.
