“Quacquarelli Symonds” (QS) beynəlxalq reytinq agentliyi tərəfindən “QS dünya universitetləri reytinqi”nin nəticələri açıqlanıb.
EDnews xəbər verir ki, bu barədə Elm və Təhsil Nazirliyi məlumat yayıb.
Bildirilib ki, nəticələrə əsasən, ölkə tarixində ilk dəfə 3 Azərbaycan universiteti sözügedən reytinqin TOP 800-lüyündə qərarlaşıb. Eyni zamanda TOP 1000-də təmsil olunan Azərbaycan universitetlərinin sayı 6-dan 7-yə yüksəlib. Ümumilikdə isə reytinqdə yer alan yerli ali təhsil müəssisələrinin sayı 10-a çatıb.
Reytinqdə Bakı Dövlət Universiteti 123 pillə irəliləyərək dünyada 565-ci yerdə qərarlaşıb. Azərbaycan Dövlət İqtisad Universiteti əvvəlki 801–850 aralığından 634-cü yerə yüksəlib. Azərbaycan Dövlət Neft və Sənaye Universiteti isə 851–900 aralığından 711–720 aralığınadək irəliləyib.
Bununla yanaşı, Azərbaycan Texniki Universiteti, Xəzər Universiteti, Bakı Mühəndislik Universiteti, Azərbaycan Memarlıq və İnşaat Universiteti və ADA Universiteti də mövqelərini yaxşılaşdıraraq reytinqdə irəliləyiblər. Sumqayıt Dövlət Universiteti mövqeyini qoruyub saxlayıb, Azərbaycan Dövlət Pedaqoji Universiteti isə ilk dəfə bu reytinqə daxil olub.
Nazirliyin məlumatına görə, QS reytinqində Azərbaycan universitetlərinin sayı Cənubi Qafqaz regionunun digər ölkələrindən reytinqə daxil olan universitetlərin ümumi sayından 2,5 dəfə çoxdur.
Qeyd edək ki, 2025-ci ilədək Azərbaycan universitetləri dünya reytinqlərində TOP 800-lükdə təmsil olunmayıb. 2025-ci ildə ilk dəfə 1 universitetimiz TOP 800-ə daxil olub, 2026-cı ildə isə bu göstərici 3-ə çatıb.
Sözügedən reytinqə dünyanın 106 ölkəsi üzrə 1500-dən çox universitet daxil edilib.
