Rusiya-Ukrayna müharibəsində cəbhə xəttində gərginlik artdıqca, tərəflərin hərbi taktikası da dəyişir.
Son həftələr Ukraynanın Rusiya ərazisinə PUA hücumlarını intensivləşdirməsi Moskva-Kiyev qarşıdurmasında yeni mərhələ kimi qiymətləndirilir.
Rusiyalı hərbi ekspert Yevgeni Mixaylov hesab edir ki, bu hücumlar təkcə hərbi hədəflərlə bağlı deyil, həm də psixoloji təzyiq elementi daşıyır.
O bu barədə EDnews-a danışarkən bildirib ki, PUA hücumları təkcə infrastruktura qarşı deyil, həm də Rusiya daxilində əhaliyə psixoloji təzyiq vasitəsi kimi istifadə olunur.
“Kiyev rejimi son vaxtlar Rusiya Federasiyasının ərazisinə PUA-larla hücumları kəskin şəkildə artırıb. Adətən zərbələrin böyük hissəsi məhz mülki obyektlərə və mülki şəxslərə yönəlir. Təbii ki, infrastruktura da zərbələr endirilir”, — deyə ekspert qeyd edib.
Ekspert hesab edir ki, hücumların intensivləşməsi Rusiya qoşunlarının cəbhənin müxtəlif istiqamətlərində irəliləməsi ilə əlaqəlidir.
“Bu, Ukrayna qoşunlarının təmas xəttindəki ağır vəziyyəti və Rusiyanın faktiki olaraq bütün cəbhə boyunca hücuma keçməsi ilə bağlıdır. Kiyevin Qərb tərəfdaşları Ukraynaya maksimum dəstək göstərməyə davam edir ki, ölkə hərbi əməliyyatları davam etdirmək imkanını qoruya bilsin”.
Mixaylov həmçinin qeyd edib ki, dron hücumları xüsusilə yay mövsümü ərəfəsində Rusiya daxilində əhalini qorxutmaq cəhdi kimi də qiymətləndirilə bilər.
Rusiya ilə Ukrayna arasında danışıqların perspektivindən danışan ekspert bildirib ki, hazırkı mərhələdə danışıqları real hesab etmir.
“Danışıqlar indi tamamilə mənasızdır. Ən ağır münaqişələr zamanı belə qarşı tərəfə mövqeyini çatdırmaq imkanı olur. Amma bu mərhələdə Rusiya artıq danışıqlar aparmayacaq, çünki bunun mənası yoxdur. Açıq şəkildə deyə bilərəm ki, Moskva Kiyevə əlavə vaxt qazanmağa imkan verməmək üçün Ukraynanın hərbi infrastrukturu ilə bağlı obyektlərə zərbələri davam etdirəcək. Rusiya xalqı artıq müharibə şəraitinə öyrəşib və xalq olaraq birləşib. Bizi qorxutmaq mümkün olmayacaq. Diplomatiyadan danışmaq olarsa, bu, yalnız Rusiya Federasiyasının şərtləri əsasında ola bilər”, — deyə Yevgteni Mixaylov əlavə edib.
Onun sözlərinə görə, Ukrayna daxilində mobilizasiya və hakimiyyətin qərarları ilə bağlı narazılıq günü-gündən artır.
Hərbi ekspert Donbasda Rusiya qüvvələrinin irəliləyişinin davam edəcəyini, həmçinin sərhədyanı bölgələrdə bufer zonanın genişləndiriləcəyini proqnozlaşdırır.
“Yaxın vaxtlarda Konstantinovkanın azad edilməsini görəcəyik, bundan sonra yalnız Slavyansk-Kramatorsk aqlomerasiyası qalacaq. Daha sonra diqqət Xerson və Zaporojye vilayətlərinə, həmçinin Sumı və Xarkov vilayətlərində bufer zonanın genişləndirilməsinə yönələcək”, — deyə hərbi ekspert bildirib.
Mixaylovun fikrincə, Ukraynanın PUA hücumlarını artırması cəbhədəki vəziyyəti dəyişməkdən daha çox, Rusiyaya daxildən təzyiq göstərmək və vaxt qazanmaq cəhdi kimi dəyərləndirilə bilər.
Ekspert hesab edir ki, yaxın dövrdə həm cəbhə xəttində, həm də Rusiya-Ukrayna qarşıdurmasının diplomatik müstəvisində gərginlik daha da arta bilər. Onun sözlərinə görə, hadisələrin sonrakı inkişafı təkcə döyüş meydanındakı vəziyyətdən deyil, həm də Qərbin Kiyevə göstərəcəyi hərbi dəstəyin miqyasından asılı olacaq.
Aysel Hacıyeva | EDnews
