Xəbər verdiyimiz kimi, Abşeronda - Fatimeyi Zəhra Məscidinin yaxınlığındakı Goradil qəbiristanlığından tapılan 2 yaşlı uşağın valideynlərinin kimliyi müəyyənləşdi. Cəmiyyət ananı qınasa da, o, uşaqdan rəsmi qaydada imtina etdi.
Valideynləri tərəfindən tərk edilən uşaqların hekayələri fərqli olsa da, son eynidir: Travmalar, suallar və tənhalıq...
Sosioloq Hüseyn İbrahimov bu barədə EdNews-a danışarkən bildirib ki, bəzən valideynlərin uşaqlarından imtina etməsini sosial problemlərlə, bəzənsə müəyyən psixoloji, ailədaxili problemlərdən yaranan zidiyyətlərlə izah edirlər:
“Həmin valideynlərin sosial problemlərindən xəbərsizik. Amma düşünürəm ki, Azərbaycanda sosial problemlərinə görə hər hansı bir valideynin uşağıdan imtina etməsi halı real deyil. Bu, ənənələrə də ziddir. Səbəb daha çox ailədaxili zidiyyətlər zəminində üzə çıxan psixoloji faktorla bağlı ola bilər”.
Ailə, Qadın və Uşaq Problemləri üzrə Dövlət Komitəsi isə hesab edir ki, baş vermiş bu hadisə bir daha uşaqların hüquqlarının qorunması və risk altında olan ailələrin vaxtında müəyyən edilməsi istiqamətində həyata keçirilən fəaliyyətin davamlı və sistemli şəkildə gücləndirilməli olduğunu göstərir.
Komitədən EdNews-a verilən açıqlamada bidirilib ki, Azərbaycanda bu kimi halların qarşısının alınması məqsədilə Ailə, Qadın və Uşaq Problemləri üzrə Dövlət Komitəsi tərəfindən bir sıra istiqamətlər üzrə fəaliyyət həyata keçirilir:
“İlk növbədə, erkən risklərin müəyyən edilməsi üçün yerlərdə monitorinqlər və sosial araşdırmalar aparılır, çətin həyat şəraitində olan ailələr nəzarətə götürülür. Bu ailələrlə sosial işçilər tərəfindən fərdi qaydada iş aparılır, psixoloji və sosial dəstək göstərilir.
Bundan əlavə, valideyn məsuliyyətinin artırılması məqsədilə maarifləndirmə tədbirləri, ictimai kampaniyalar və təlimlər təşkil olunur. Erkən və məcburi nikahların, həmçinin uşaqların baxımsız qalması riskinin qarşısının alınması üçün digər dövlət qurumları ilə birgə kompleks tədbirlər həyata keçirilir”.
Qurumdan vurğulanıb ki, eyni zamanda, uşaqların təhlükəsizliyinin təmin olunması üçün dəstək xətləri fəaliyyət göstərir, daxil olan müraciətlər operativ şəkildə araşdırılır və zəruri hallarda uşaqlar dövlət himayəsinə götürülür.
“Belə hallarda əsas prioritet uşağın mənafeyi, təhlükəsizliyi və sağlam inkişafıdır. Bu istiqamətdə görülən işlər davam etdirilir və məqsəd hər bir uşağın təhlükəsiz mühitdə böyüməsini təmin etməkdir”.
Müqayisə üçün qeyd edək ki, uşaqların valideynlər tərəfindən tərk edilməsi (abandonment) qlobal problemdir. Bir çox hallarda bu hadisələr rəsmi statistikaya düşməsə də, bəzi ümumi tendensiyalar var. Adətən Nigeriya, Efiopiya, Hindistan, Banqladeş, Rumıniya, Ukrayna və Braziliya kimi yerlərdə uşaq tərk etmə halları daha çox müşahidə olunur: Valideynlərin uşaqları tərk etməsinin əsas səbəbləri kimi kəskin yoxsulluq və işsizlik; Ailə daxilində zorakılıq; Erkən və planlaşdırılmamış hamiləliklər; Sosial dəstək sistemlərinin zəif olması; Müharibə və məcburi köç və bəzi hallarda mədəni və gender əsaslı təzyiqlər göstərilir.
Günəş Mərd
