Bu gün daha bir yurd həsrətli, nisgilli yurddaşımız Leyla xanım dünyasını dəyişdi.
Xəlilova Leyla Kərbəlayi Əli qızı kimdir?
O, 1930-cu ildə Dərələyəz mahalının Çivə kəndində anadan olub. Çivə kənd orta məktəbində ibtidai təhsil alıb (qohumları Zinyət və İsmayıl Nurəlievlərlə bir sinifdə oxuyublar). 1948-ci ildə Çivə kəndində Xəlilov Hüseyn Həsən oğlu ilə ailə qurub. Bu nigahdan Çivə kəndində olarkən Həqiqət adlı qızları doğulub. Gənc ailənin sevinci o qədər də uzun çəkməyib. Türk düşməni İosif Stalinin məlum qərarı ilə həmin gənclər körpə qızları Həqiqət ilə birlikdə ellikcə doğma Çivə kəndindən deportasiya edilmək məcburiyyətində qalıblar.
Leyla Xəlilova həmin ağır günləri belə xatırlayır:
“1951-ci ildə bizi dədə-baba yurdumuz olan Çivə kəndindən yük vaqonlarına doldurub (2-3 günə) Yevlaxa yola saldılar. Yevlaxdan bizi Bərdənin Piyadalar, Soğanverdi, Şahvəllər, Xanərəb kəndlərinə bölüşdürdülər. Bizim ailə Xanərəb kəndinə yerləşdi. Onu da qeyd edim ki, 1918-ci il hadisələri zamanı Çivə kəndindən Bərdənin Həsənqaya kəndinə köçən Əliəkbər adlı kəndçimiz var idi. O, Həsənqaya kəndində vəzifə tuturdu. Əliəkbər kişi bizə ellilikcə İmirli kəndinə məskunlaşmağımızı məsləhət bildi. Beləliklə biz mart ayında Xanərəb kəndindən İmirli kəndinə köçdük. Biz İmirliyə köçəndə kənd meşəlik idi, bircə cığır yolu bir də məscidi və gümbəzi var idi. Meşəliyin hamısını əllərimizlə qırdıq və buranı özümüzə yurd etdik. Əlbəttə doğma kəndimizi tərk etməyimizi həzm edə bilmirdik. Amma nə etmək olar? Taleyin hökmünə boyun əyməkdən başqa yolumuz yox idi. Biz dağ adamları idik sağlam və güclü. Yeraltı qazmalar qazdıq və iki ilə yaxın qazmalarda yaşadıq. Sonra yerin üstündə evlər tikdik. Əvvəllər kənddə yalnız bizim Çivə camaatı idi. Sonradan Dərələyəzin Sallı, Vedibasarın Hortun, Göyçə mahalının Mollalı kəndindən gələn camaat da gəlib İmirlidə məskunlaşdılar. Mən Çivədən gələndə 20 yaşım var idi və yeni ailə qurmuşdum. Bir övladımız var idi. Qalan övladlarımız İmirli kəndində doğuldu. Deyirdilər bizi Stalin Qazaxıstana sürgün etmək istəyirmiş. Mircəfər Bağırov deyib ki, mənim Qarabağda boş torpağım çoxdu, niyə getsinlər Qazaxıstana? Beləliklə bizi Mircəfər Bağırov Qarabağda yerləşdirib. Biz indi buranın vətəndaşıyıq, buralara öyrəşmişik. Amma əlbəttə bizim üçün Çivə daha doğmadır”. (S.Vəkilov: “Qərbi Azərbaycandan deportasiya: İmirlidə məskunlaşma” kitabı, s-213).
Ömrünün son illərini Bakı şəhərində yaşayan Leyla Xəlilova bu gün dünyasını dəyişib.Bərdədə İmirli kənd məzarlığında dəfn edilib. Yaxınlarına övladlarına başınız sağ olsun, məkanı cənnət olsun deyirik!
Səməd Vəkilov
Müvəkkil Hüquq Mərkəzinin sədri
