Ukrayna Ali Radasına ölkədə satılan malların etiketlərində və xidmət sahələrində məlumatların tərcüməsi zamanı rus dilindən istifadənin qadağan edilməsini nəzərdə tutan qanun layihəsi təqdim olunub.
EDnews xəbər verir ki, mövcud qanunvericiliyə əsasən, istehsalçılar və satıcılar məhsullar barədə məlumatı dövlət dilində təqdim etməlidirlər. Eyni zamanda, həmin məlumatın digər dillərə tərcüməsinə də icazə verilir. Yeni qanun layihəsinin müəllifləri isə rus dilinin icazə verilən dillər siyahısından çıxarılmasını təklif edirlər.
Sənəd müəlliflərinin fikrincə, mallar və xidmətlər haqqında məlumatlar ictimai informasiya məkanının bir hissəsidir və bu sahədə rus dilindən istifadə Rusiyanın simvolik təsirini qoruyub saxlayır. Bu səbəbdən tərcümə üçün yeganə istisnanın məhz rus dilinə şamil olunması təklif edilir.
Qeyd edək ki, iyun ayında Ukrayna Prezidenti Volodimir Zelenski rus dilini qorunan dillər siyahısından çıxaran qanunu imzalayıb. Bununla yanaşı, Ukrayna Konstitusiyası milli azlıqların, o cümlədən rus dilinin istifadəsi və müdafiəsi ilə bağlı müddəaları qüvvədə saxlayır.
Rus dilinin Ukraynadakı hüquqi statusu Rusiya-Ukrayna münaqişəsinin nizamlanması üzrə danışıqların əsas mövzularından biri olaraq qalır. Prezident Volodimir Zelenski isə rus dilinə dövlət dili statusunun verilməsi ilə bağlı tələbləri "ultimatum" adlandıraraq bunu qəbul etməyəcəyini bildirib.
