Yay aylarında havaların isti keçməsi insan orqanizminə təsir etdiyi kimi, bəzi dərmanların təsirini və yan təsirlərini də dəyişə bilər.
EDnews-un məlumatına görə, mütəxəssislər bildirirlər ki, yüksək temperatur, güclü tərləmə və susuzlaşma fonunda bəzi preparatların həkim məsləhəti olmadan qəbulu ciddi sağlamlıq problemlərinə səbəb ola bilər.
Ən çox diqqət edilməli dərman qruplarından biri antibiotiklərdir. Həkim təyinatı olmadan qəbul edilən antibiotiklər virus infeksiyalarına qarşı təsirsiz olmaqla yanaşı, bakteriyaların antibiotiklərə davamlılığını artırır. Bundan başqa, bəzi antibiotiklər günəş şüalarına qarşı həssaslığı yüksəldərək dəridə yanıq və səpkilərin yaranmasına səbəb ola bilər.
Sidikqovucu preparatlar da yay aylarında ehtiyatla istifadə edilməlidir. Bu dərmanlar orqanizmdən maye itkisini artırdığı üçün isti havada susuzlaşma, arterial təzyiqin kəskin enməsi və elektrolit balansının pozulması riski yaradır.
Hipertoniya əleyhinə dərman qəbul edən şəxslər də diqqətli olmalıdır. Yayda damarların genişlənməsi səbəbindən qan təzyiqi təbii olaraq aşağı düşə bilər. Buna görə də dərmanların dozasını özbaşına artırmaq və ya azaltmaq düzgün deyil. Hər hansı dəyişiklik yalnız həkimin tövsiyəsi ilə edilməlidir.
Mütəxəssislər ağrıkəsici preparatların da nəzarətsiz qəbulundan çəkinməyi tövsiyə edirlər. Xüsusilə ibuprofen, diklofenak və digər qeyri-steroid iltihabəleyhinə dərmanlar uzun müddət qəbul edildikdə mədə-bağırsaq qanaxmaları və böyrəklərin fəaliyyətində problemlər yarada bilər. İsti hava və susuzlaşma isə bu riski daha da artırır.
Hormonal preparatlar, qan durulaşdırıcılar və göbələk əleyhinə dərmanlar da yalnız həkim nəzarəti altında qəbul edilməlidir. Bu preparatların düzgün istifadə olunmaması ciddi fəsadlara, o cümlədən qanaxmalara, hormonal pozğunluqlara və qaraciyər zədələnməsinə səbəb ola bilər.
Həkimlər həmçinin dərmanların saxlanma şəraitinə də diqqət yetirməyi məsləhət görürlər. Preparatlar günəş şüaları altında, avtomobildə və ya yüksək temperatur olan yerlərdə saxlanılmamalıdır. Çünki istilik onların tərkibini dəyişdirə və effektivliyini azalda bilər.
Mütəxəssislərin fikrincə, yay aylarında hər hansı dərmanı qəbul etməzdən əvvəl, xüsusilə xroniki xəstəliklərdən əziyyət çəkən şəxslər mütləq həkim və ya əczaçı ilə məsləhətləşməlidirlər. Özbaşına dərman qəbulu sağlamlıq üçün gözlənilməz və təhlükəli nəticələrə səbəb ola bilər.
