Mədəniyyət Nazirliyi, Azərbaycan Milli Elmlər Akademiyası, Elm və Təhsil Nazirliyinin birgə təşkilatçılığı ilə keçirilən "Türk Dünyası Həftəsi" çərçivəsində “Birinci Türkoloji Qurultay: yüz ilin elmi vǝ mǝdǝni irsi” mövzusunda beynǝlxalq konqres davam edir.
EDnews xəbər verir ki, iyunun 30-da yüz il öncə Birinci Türkoloji Qurultaya ev sahibliyi edən İsmailiyyə binasında (hazırda AMEA Rəyasət Heyətinin binası) tədbir keçirilib.
Əvvəlcə Azərbaycanın mədəniyyət naziri Adil Kərimli, Özbəkistanın mədəniyyət naziri Ozodbek Nazarbekov, Qazaxıstan Prezidentinin müşaviri Malik Otarbayev, Azərbaycan Respublikasının Prezident Administrasiyası Humanitar siyasət, diaspor, multikulturalizm və dini məsələlər şöbəsinin müdir müavini Məhərrəm Əhmədov, Türkiyə Elmlər Akademiyasının prezidenti Müzəffər Şəkər və konqresin digər iştirakçıları bina ilə yaxından tanış olublar.
AMEA-nın prezidenti akademik İsa Həbibbəyli binanın inşa tarixi, memarlığı haqqında ətraflı məlumat verib.
Tarixi zalda davam edən tədbirdə akademik İsa Həbibbəyli Birinci Türkoloji Qurultayın əhəmiyyətindən söz açıb. Qeyd edib ki, məhz bu qurultay sayəsində "Türk dünyası" anlayışı elmi-ictimai dövriyyəyə daxil olub və türkologiyanın inkişaf istiqamətləri müəyyənləşib.
Mədəniyyət naziri Adil Kərimli çıxışında qeyd edib ki, Azərbaycan dövləti tərəfindən Birinci Türkoloji Qurultayın irsinə həmişə yüksək diqqət göstərilib. Qurultayın 80 və 90 illik yubileyləri də dövlət səviyyəsində qeyd olunub.
Nazir deyib ki, Birinci Türkoloji Qurultay elmi anlayışdan əlavə, həm də böyük bir mədəni dəyər daşıyır.
Müasir türkologiya elmi qurultayın zəngin irsinin yaşadılması və təbliğinə daha böyük töhfələr verə bilər.
Adil Kərimli "Azərbaycan Mədəniyyəti - 2040" Konsepsiyasında milli-mədəni kimliklə bağlı mühüm məsələlərin əksini tapdığını bildirib, bu kontekstdə Türk dünyası ilə əlaqələrin əhəmiyyətini diqqətə çatdırıb.
Sonra Özbəkistanın mədəniyyət naziri Ozodbek Nazarbekov, Qazaxıstan Prezidentinin müşaviri Malik Otarbayev, Türkiyə Elmlər Akademiyasının prezidenti Müzəffər Şəkər, Xalq şairi Sabir Rüstəmxanlı və başqaları çıxış ediblər.
Çıxışlarda "Türk Dünyası Həftəsi"nin əhəmiyyəti vurğulanıb. Silsilə tədbirlərin türk xalqları arasında elmi-mədəni inteqrasiyasının inkişafına töhfə verəcəyi vurğulanıb.
Sonda Azərbaycandan və digər ölkələrdən bir qrup alim və mütəxəssisə Mədəniyyət Nazirliyinin təsis etdiyi "Birinci Türkoloji Qurultayın 100 illiyi (1926–2026)" xatirə nişanı təqdim olunub.
.jpeg)
.jpeg)
