Yol qəzasında bir nəfərin ölümü və digər şəxsin xəsarət alması ilə bağlı təqsirləndirilən “Arzum 999” ləqəbli tiktoker İlduzə Hacıyevanın cinayət işi üzrə məhkəmə prosesi davam edir.
Dövlət ittihamçısı onun 5 il 9 ay müddətinə azadlıqdan məhrum edilməsini və məhkəmə zalından həbs olunmasını təklif edib.
Mövzu ilə bağlı vəkil Könül Qədimbəyli EDnews-a açıqlamasında bildirib ki, hadisənin görüntülərinə əsasən ilkin baxış zamanı təqsirləndirilən şəxsin əməlində birbaşa cinayət tərkibi olduğu qənaətinə gəlmək mümkün deyil.
Vəkilin sözlərinə görə, görüntülərdən avtomobilin dönmə manevri etdiyi və xəbərdarlıq siqnalından istifadə olunduğu ehtimal edilir, lakin yekun hüquqi qiymət yalnız ekspertiza və məhkəmə araşdırmaları nəticəsində müəyyən edilə bilər.
K.Qədimbəyli qeyd edib ki, bu tip yol-nəqliyyat hadisələri üzrə adətən yol-nəqliyyat ekspertizası təyin olunur və zərurət yarandıqda əlavə, təkrar və ya komissiya ekspertizası keçirilə bilər:
“Ekspert rəyi mühüm sübut olsa da, məhkəmə üçün mütləq xarakter daşımır. Yekun qərar iş üzrə bütün sübutlar, ekspert rəyləri və məhkəmə araşdırmasının nəticələri əsasında veriləcək”.
Vəkil əlavə edib ki, məhkəmə prosesinin nəticəsini əvvəlcədən demək düzgün deyil və yekun hökm məhkəmənin obyektiv qiymətləndirməsindən asılı olacaq.
