Xankəndi şəhəri, Ağdərə və Xocalı rayonlarında fəaliyyət göstərən ümumtəhsil məktəblərində 2025–2026-cı tədris ilinin başa çatması münasibətilə “Son zəng” tədbirləri keçirilib.
EDnews xəbər verir ki, bu barədə Xankəndi şəhərində, Ağdərə və Xocalı rayonlarında Bərpa, Tikinti və İdarəetmə Xidmətinin ictimaiyyətlə əlaqələr şöbəsindən məlumat verilib.
Bildirilib ki, bu il Xankəndi şəhərindəki 4 nömrəli tam orta məktəbdən 32 şagird məzun olub.
Xocalı rayonunda isə Ballıca kənd tam orta məktəbindən 15, Xocalı şəhər 1 nömrəli tam orta məktəbindən 6 şagird məktəbi başa vurub.
Ağdərə rayonunda fəaliyyət göstərən Vəngli tam orta məktəbində 3, Həsənriz tam orta məktəbində isə 4 şagird məzun adını qazanıb.
“Son zəng” tədbirlərində işğaldan azad olunmuş ərazilərdə aparılan genişmiqyaslı bərpa və yenidənqurma işləri xüsusi vurğulanıb.
Qeyd edilib ki, bu ərazilərdə müasir təhsil infrastrukturunun yaradılması, yeni məktəb binalarının tikilməsi, mövcud təhsil ocaqlarının əsaslı təmir və bərpası istiqamətində mühüm işlər görülür.
