Rusiya təhlükəsizlik qüvvələri tərəfindən Yekaterinburq şəhərində azərbaycanlılara qarşı həyata keçirilən reydlər zamanı iki qardaşın - Ziyəddin və Hüseyn Səfərovların ölümü, habelə soydaşlarımıza qarşı tətbiq edilən işgəncələr Azərbaycan-Rusiya münasibətlərində gərginlik yaranmasına səbəb olub.
Bu hadisələr etnik əsaslı və məqsədyönlü şəkildə olduğu üçün Bakı Moskva ilə bir neçə səviyyədə əlaqəni məhdudlaşdırıb. Rusiya ilə yüksəksəviyyəli diplomatik görüşlər və mədəni tədbirlər ləğv edilib. Bu istiqamətdə gündəmə gələn məsələlərdən biri də hazırda Müstəqil Dövlətlər Birliyi (MDB) çərçivəsində təşkil olunan və sentyabrın 28-dən oktyabrın 8-ə qədər Gəncə və digər 6 şəhərimizdə keçirilməsi planlaşdırılan III MDB Oyunlarının ləğvidir. Bununla yanaşı, MDB-nin keçmiş SSRİ ölkələrinin əksəriyyətinin birləşdiyi dövlətlərarası birlik olduğunu da nəzərə alsaq, Azərbaycanın qurumdan çıxması da müzakirə predmetidir. Bəs bu nə qədər mümkündür?
Milli Məclisin deputatı Elçin Mirzəbəyli hesab edir ki, MDB uzun müddətdir ki, effektiv institutdan daha çox, formal platforma təsiri bağışlayır:
"Təsisatda siyasi və hüquqi mexanizmlər kifayət qədər zəifdir. Təşkilatın qəbul etdiyi sənədlərin əksəriyyəti də tövsiyə xarakteri daşıyır və icrası məcburi deyil. Üzv ölkələrin açıq və birbaşa olmasa da, fərqli geosiyasi oriyentasiyaları var. Digər tərəfdən, Azərbaycan üçün də MDB heç vaxt strateji platforma olmayıb, daha çox, münasibətləri diplomatik səviyyədə qorumaq üçün alternativ vasitə rolunu oynayıb".
"Qeyd edim ki, hüquqi baxımdan istənilən üzv dövlət birliyin tərkibindən çıxmaq səlahiyyətinə malikdir. Prosedur mürəkkəb deyil. Çıxış üçün rəsmi müraciət və müəyyən keçid müddəti kifayətdir. Bununla belə, bu cür addımın atılması həm geosiyasi, həm də iqtisadi baxımdan ciddi qiymətləndirmə tələb edir", - parlamentari vurğulayıb.
MDB Oyunlarının ləğvi ilə bağlı sualı cavablandıran millət vəkili əlavə edib ki, bu, daha çox humanitar xarakter daşıyır:
"Belə tədbirlər üzv ölkələrdə gənclər arasında dostluq münasibətlərini təşviq etmək məqsədi güdür".
"Bütövlükdə isə MDB Azərbaycanın iqtisadi-siyasi gündəmində həlledici təsir vasitəsi deyil. Təşkilat daha çox, keçmiş postsovet məkanında formal əməkdaşlıq aləti rolunu oynayır və bundan sonra da ciddi əməkdaşlıq platformasına çevriləcəyi ehtimalı azdır".
