Ermənistanda keçirilən parlament seçkilərindən sonra Baş nazir Nikol Paşinyan Rusiyaya səfər edib.
Səfər rəsmi olaraq beynəlxalq sənaye sərgisində iştirak məqsədi daşısa da, lakin Moskva və İrəvan arasında son dövrlər gərginləşən münasibətlər fonunda bu görüş xüsusi əhəmiyyət kəsb edir.
Mövzu ilə bağlı politoloq Taleh Əliyev EDnews-a danışarkən qeyd edib ki, Ermənistanın Baş naziri Nikol Paşinyanın Rusiyaya bu qeyri-rəsmi səfərini ilk xarici səfəri hesab etmək olmaz. Çünki bundan əvvəl o, İranın ali dini lideri Əli Xameneinin dəfn mərasimində iştirak etmək üçün Tehrana səfər edib. Lakin həmin səfər tamamilə fərqli xarakter daşıyırdı:
"Moskva iyunun 7-də keçirilən parlament seçkilərindən sonra Nikol Paşinyanı rəsmi şəkildə təbrik etməsə də, Paşinyan bu səfərlə faktiki olaraq Ermənistanın yenidən seçilmiş lideri kimi Rusiyaya gedərək legitimliyini nümayiş etdirmək istədi. Bu səfər çərçivəsində isə Rusiya və ya Rusiyanın baş naziri Nikol Paşinyana hər hansı şərtlər diktə edə bilməz. Bundan əvvəl Vladimir Putin Paşinyanla görüşündə Rusiyada yaşayan Ermənistan vətəndaşlarının seçkilərdə daha fəal iştirak etməsi ilə bağlı istəyini ifadə edib. Lakin Paşinyan bu məsələyə xüsusi önəm vermədi. Bu baxımdan, Rusiyanın baş nazirinin də Paşinyana hər hansı mesaj və ya şərt diktə etməsi real görünmür".
Politoloq hesab edir ki, sözügedən səfər ikitərəfli münasibətlərin inkişafı baxımından da ciddi nəticələr verməyəcək. Habelə Nikol Paşinyanın Rusiyanın Ermənistandakı iqtisadi fəaliyyətinin inkişafına dəstək verəcəyi ilə bağlı səsləndirdiyi fikirlər yaxın dövrdə öz təsdiqini tapmayacaq. Əksinə, qarşıdakı mərhələdə bunun əksini müşahidə etmək mümkündür. Nikol Paşinyan dəfələrlə bəyan edib ki, Ermənistanın Avropa inteqrasiyası istiqamətində fəaliyyətini daha da gücləndirmək niyyətindədir. Eyni zamanda, Rusiyanın təsiri altında olan təşkilatlardan mərhələli şəkildə uzaqlaşma siyasətini davam etdirəcək.
Taleh Əliyev onu da əlavə edib ki, bu görüş daha çox formal xarakter daşıyırdı. Səfərin ən mühüm siyasi nəticəsi isə ondan ibarətdir ki, Moskvanın seçkilərdən sonra onu rəsmi şəkildə təbrik etməməsinə baxmayaraq, Nikol Paşinyan yenidən Ermənistanın lideri kimi Rusiyaya səfər etdi və bununla da öz siyasi legitimliyini nümayiş etdirmiş oldu.
Xatırladaq ki, son illərdə Ermənistanın Avropa İttifaqı ilə münasibətləri genişləndirilməsi, İrəvanın Kollektiv Təhlükəsizlik Müqaviləsi Təşkilatından uzaqlaşması və Rusiyanın regiondakı təsir imkanlarının zəifləməsi iki ölkə arasında fikir ayrılıqlarını daha da dərinləşdirib. Parlament seçkilərindən sonra Kremlin Paşinyanı rəsmi şəkildə təbrik etməməsi də münasibətlərdəki soyuqluğun davam etdiyini göstərən amillərdən biri kimi qiymətləndirilir.
Aytac Kərimova | EDnews
.jpg)
