Rusiya xarici işlər nazirinin müavini Mixail Qaluzinin sözlərinə görə, Rusiya TRIPP layihəsinə qatılmaq istəyir və onun iştirakı layihəyə yalnız əlavə güc qata bilər.
Maraqlıdır, Qaluzinin bu bəyanatı Rusiyanın Cənubi Qafqazda nəqliyyat marşrutları üzərində təsirini qorumaq cəhdi kimi qiymətləndirilə bilərmi?
Mövzu ilə bağlı EDnews-a danışan siyasi şərhçi Çingiz Şahbazi qeyd edib ki, Moskva TRIPP layihəsindən kənarda qalmaq istəmir:
"Qaluzinin bu istiqamətdə verdiyi açıqlama da göstərir ki, Rusiya ABŞ-nin dəstəklədiyi TRIPP layihəsində rol oynamaq niyyətini gizlətmir. Əslində, bu bəyanatın arxasında bir neçə mühüm geosiyasi məqsəd dayanır. Bunlardan ən vacibi Cənubi Qafqazda təsiri qoruyub saxlamaq və mövcud infrastruktur üzərində müəyyən nəzarət mexanizmi əldə etməkdir. Məlumdur ki, TRIPP layihəsi Ermənistan üzərindən yeni nəqliyyat dəhlizinin yaradılmasını nəzərdə tutur. Əgər layihə ABŞ-nin dəstəyi ilə həyata keçirilərsə, Rusiyanın bölgədəki təsiri ciddi şəkildə zəifləyə bilər. Bu səbəbdən, Moskva prosesdə iştirak etmək niyyətindədir".
Siyasi şərhçi vurğulayıb ki, Ermənistan dəmir yollarını hələ də Rusiyanın törəmə şirkəti idarə edir və Ermənistanın İranla sərhədində Rusiya hərbçiləri xidmət aparırlar. Bu baxımdan, Moskva hesab edir ki, Rusiyanın layihədə iştirakı ona əlavə güc verə bilər:
"Burada Avrasiya İqtisadi İttifaqı ölkələrinin də maraqları var. Rusiya tərəfi bildirir ki, Ermənistan hələ də Avrasiya İqtisadi İttifaqının üzvüdür və tranzit qaydaları bu təşkilatın normalarına uyğun olmalıdır. Moskvanın arqumentlərinə bu yöndən baxdıqda, mövcud dəmir yolu xətti ilə inteqrasiyanın asanlaşdırılması, Azərbaycan, Ermənistan və Rusiya arasında əvvəlki nəqliyyat mexanizmlərindən istifadə edilməsi, yükdaşımaların texniki uyğunluğunun və təhlükəsizlik koordinasiyasının gücləndirilməsi mümkün görünür. Lakin bütün bunlar Rusiyanın öz mövqeyidir. Şübhəsiz ki, Rusiyanın layihədə yer alması gələcəkdə onun bölgədə təsirini yenidən gücləndirməsinə imkan yarada bilər. Bu isə layihəyə kölgə sala və onun əsas məqsədi olan alternativ nəqliyyat marşrutu ideyasını zəiflədə bilər".
Çingiz Şahbazi onu da əlavə edib ki, Rusiya əvvəllər bu layihəyə qarşı çıxırdısa, indi ona dəstək verməyə və prosesdə pay sahibi olmağa çalışır. Bu da Moskvanın mövcud reallığı düzgün qiymətləndirdiyini göstərir.
"Belə olduğuna görə, Qaluzinin bəyanatı Rusiyanın TRIPP layihəsinə artıq açıq şəkildə qarşı olmadığını, lakin layihənin Rusiya maraqları nəzərə alınmaqla həyata keçirilməsini istədiyini göstərir. Moskva bu yolla həm Cənubi Qafqazda strateji rolunu qorumağa, həm də yeni regional nəqliyyat marşrutlarında söz sahibi olmağa çalışır".
Aytaс Kərimova | EDnews
.png)
