ABŞ və İran arasında müharibənin növbəti raundu danışıqlar masasında davam edir. İndi tərəflər bir-birilərinə diplomatiya müstəvisində üstün gəlməyə çalışır. Gərgin keçəcəyi gözlənilən danışıqların ilk mərkəzi Pakistanın paytaxtı İslamabad olacaq.
Politoloq Elxan Şahinoğlu İslamabadda İran və ABŞ arasında keçiriləcək görüşlərlə bağlı gözləntilərini EDnews ilə bölüşüb.
Onun sözlərinə görə, tərəflərin irəli sürdüyü təklif paketləri bir-birinə ciddi şəkildə ziddir və bu səbəbdən ortaq məxrəcə gəlmək həm prinsipial, həm də praktik baxımdan çətin görünür. Xüsusilə razılaşma layihəsində yer alan bəzi bəndlərin artıq pozulması etimadı daha da zəiflədir.
Politoloq hesab edir ki, hazırkı mərhələdə əsas gözlənti genişmiqyaslı sülh deyil, sadəcə atəşkəsin uzadılması ola bilər:
“Reallıq ondan ibarətdir ki, tərəflər problemi tam həll edə bilmirlər. Sadəcə olaraq, müvəqqəti fasilə götürürlər. Artıq atəşkəs elan olunmasına baxmayaraq, bir neçə toqquşma qeydə alınıb. Bu isə göstərir ki, atəşkəs kövrəkdir və uzunmüddətli deyil”.
Ekspertin fikrincə, yaxın aylarda yenidən hərbi gərginliyin artması ehtimalı qalır. O xatırladır ki, regionda oxşar ssenarilər daha əvvəl də təkrarlanıb və heç bir tərəf gələcəkdə toqquşmaların olmayacağına zəmanət verə bilməz.
Elxan Şahinoğlu qeyd edir ki, əsas problemlərdən biri Iranın nüvə proqramı və ballistik raket siyasəti ilə bağlıdır. Onun sözlərinə görə, rəsmi Tehran bu istiqamətdə geri addım atmaq niyyətində deyil və bu da İsrail başda olmaqla regionda narahatlığı artırır.
Politoloq əlavə edib ki, müəyyən kompromis yalnız Hörmüz Boğazı ilə bağlı mümkündür:
“Əgər İran Hörmüz boğazı ilə bağlı mövqeyində yumşalma edərsə, bu, müəyyən kompromis kimi qiymətləndirilə bilər. Amma digər əsas məsələ, uranın zənginləşdirilməsi və ballistik raket proqramı üzrə güzəştlər real görünmür”.
Eyni zamanda o, regiondakı digər gərginlik ocaqlarının, xüsusilə Livan-İsrail xəttində baş verən hadisələrin də danışıqlara mənfi təsir etdiyini bildirib.
Ekspert hesab edir ki, danışıqların uğurlu nəticə verməsi ehtimalı zəif olsa da, tərəflər müharibənin genişlənməsində maraqlı deyillər
Sonda politoloq vurğulayıb ki, ən real ssenari atəşkəsin uzadılması və danışıqlar prosesinin davam etməsidir. Tam sülh razılaşması isə yaxın perspektivdə inandırıcı görünmür.
