Kompot – ilk baxışdan zərərsiz görünən bir içkidir. Meyvə və giləmeyvələrdən hazırlanır, uşaqlara verilir, xəstəxanalarda, yeməkxanalarda təklif olunur. Adətən evlə, sağlamlıqla assosiasiya olunur.
“EDnews” xəbər verir ki, bu şirin dadın arxasında gözlənilməz risklər gizlənə bilər. Kompot heç də həmişə faydalı deyil, bəzən isə zərərli ola bilər.
Ən böyük təhlükə – şəkərdir
Kompotda olan şəkərin miqdarı bəzən qazlı içkilərdən belə çox olur. Evdar qadınlar adət üzrə qazana bol şəkər əlavə edir və nəticədə içki bir növ şirin siropa çevrilir. Bu isə mədəaltı vəzə əlavə yük salır, şəkərli diabet, piylənmə və damar problemlərinin inkişafına səbəb ola bilər.
Vitamin itkisi
Meyvə və giləmeyvələr bişirildikdə tərkiblərindəki vitaminlərin əksəriyyəti, xüsusilə də C vitamini itir. Beləliklə, kompot sadəcə meyvə dadı olan şirin suya çevrilir.
Ev şəraitində hazırlanan kompotların riski
Əgər kompot düzgün sterilizasiya edilmədən konservləşdirilərsə, bankanın içində təhlükəli mikroorqanizmlər inkişaf edə bilər. Bu bakteriyalar ciddi qida zəhərlənmələrinə səbəb ola bilər. Bu risk xüsusilə kompot isti şəraitdə uzun müddət saxlanıldıqda artır.
Meyvə seçimi də önəmlidir
Məsələn, albalı və ya sitrus meyvələri qaynadıldıqdan sonra mədə qıcıqlanmasına səbəb ola bilər. Qastriti və ya həssas mədəsi olan insanlar üçün belə kompot bir stəkan içilsə belə, narahatlıq yarada bilər.
Sənaye üsulu ilə istehsal olunan kompotlar
Baxmayaraq ki, qablaşdırılmış kompotlar meyvəli içki təəssüratı yaradır, çox zaman onların tərkibi yalnız aromatizatorlar, boyalar, konservantlar və zərərli qatqılardan ibarət olur. Yəni insan bədəninə düşən – yalnız "kimya" və şəkərdir.
Qeyd edək ki, kompota tamamilə imtina etməli olduğunuz demək deyil. Sadəcə onu ağıllı şəkildə hazırlamaq və qəbul etmək lazımdır. Şəkəri ya heç əlavə etməyin, ya da minimal saxlayın. Uzun müddət qaynatmaq əvəzinə qısa müddət qaynadıb dəmlənməyə buraxın. Zəncəfil, nanə, darçın kimi ədviyyatlarla faydasını artıra bilərsiniz.
Ev içkilərini düzgün bişirin, onları şirin siropa çevirməyin. Kompot düşmən deyil, amma hər zaman dost da deyil. Onun faydası – necə və nə qədər içilməsindən asılıdır. Bu gün hətta uşaq içkiləri belə zərərli ola bilər. Bilgi isə – ən yaxşı qoruyucudur.
