Rusiyanın Kursk vilayətinin Korenevo yaşayış məntəqəsində yerləşən komanda məntəqəsinə endirilmiş zərbə nəticəsində azı 10 yüksək rütbəli rus zabiti məhv edilib.
“EDnews” xəbər verir ki, məhv edilənlər arasında Rusiya Sakit Okean Donanmasının Jukov ordenli 155-ci əlahiddə dəniz piyada briqadasının komandiri, polkovnik Sergey İlyin və həmin briqadanın qərargah rəisi polkovnik Leonid Başkardin də var.
Rusiya İlyinin ölümünü rəsmi şəkildə təsdiqləyib. Bildirilib ki, o, Çuvaş Respublikasında hərbi təntənə ilə dəfn olunub. Məlumata görə, polkovnik İlyin 2 iyulda Ukraynanın raket zərbəsi nəticəsində məhv edilib.
Xatırladaq ki, daha əvvəl mətbuat bu hücum nəticəsində Rusiya Hərbi Dəniz Donanmasının baş komandanının müavini, Rusiya Qəhrəmanı, general-mayor Mixail Qudkovun da həlak olduğunu yazmışdı. Qudkov əvvəllər 155-ci ayrı dəniz piyada briqadasının komandiri olub.
2022-ci ildən etibarən bu briqada Ukraynaya qarşı müharibədə iştirak edir. 2022-ci ilin martında Moşçun istiqamətində hücum zamanı Rusiya dəniz piyadaları azı 21 hərbçisini itirmişdi ki, onların çoxu məhz 155-ci briqadanın üzvləri idi.
Ukrayna kəşfiyyatı 27 mart 2022-ci ildə 155-ci briqadanın üzvlərindən ibarət hərbi cinayətkarlar siyahısı yayımlamışdı. Bildirilirdi ki, briqadanın üç hərbçisi Buça, İrpen və Qostomeldə mülki vətəndaşların qətlə yetirilməsində birbaşa iştirak ediblər.
Buna baxmayaraq, 28 mart 2022-ci ildə Vladimir Putin bu briqadanın "kütləvi qəhrəmanlıq, cəsarət, dözümlülük və şücaət” göstərdiyini bəyan edərək ona "qvardiya” fəxri adını vermişdi.
2023-cü ilin dekabr ayına olan məlumata görə, briqada azı 234 nəfər döyüşçüsünü itirib, ümumi itkilər isə 1450 nəfəri keçib.
Xatırladaq ki, bundan əvvəl - 15 iyun tarixində Ukrayna cəbhəsində Rusiya tərəfindən Zaporojye vilayətində yaradılmış "özünümüdafiə dəstəsi”nin komandiri məhv edilib. Bildirilir ki, bu şəxs 2014-cü ildəki Avromaydan hərəkatının dağıdılmasında iştirak etmiş, daha sonra isə Ukrayna ordusunu tərk edərək Rusiyaya xidmət etməyə başlamışdı.
Bundan əvvəl isə – 7 mayda – Ukraynada Rusiya Pskov diviziyasının komandiri öldürülmüşdü. Bu diviziyanın hərbçiləri daha əvvəl Buçada insanlara işgəncə vermiş və ukraynalı hərbi əsirləri qətlə yetirmişdilər.
