İyunun 21-də Türkiyədə "13-cü Beynəlxalq Sarıyer Ədəbiyyat Günləri" adlı tədbir keçirilib.
EDnews xəbər verir ki, ədəbi-mədəni tədbir tanınmış aktyor, yazıçı və ictimai xadimlər bir araya gətirib.
Tədbirdə türkiyəli aktyor və yazıçı Tamer Levent, Sarıyer bələdiyyəsinin sədri Mustafa Oktay Aksu, yazıçı, tarixçi və beynəlxalq əlaqələr üzrə mütəxəssis Nicat Mədətli (Nejat Madatoğlu), ArtShop Nəşriyyatının rəhbəri Vedat Akdamar, eləcə də ədəbiyyat və mədəniyyət ictimaiyyətinin digər tanınmış nümayəndələri iştirak ediblər.
Tədbir çərçivəsində ədəbiyyatın və sənətin insan həyatında, xüsusilə də insan taleyinin formalaşmasında oynadığı rol ətrafında geniş fikir mübadiləsi aparılıb. Çıxış edənlər müasir dövrdə texnologiyaların sürətli inkişafının cəmiyyətə təsirindən bəhs edərək, bu şəraitdə ədəbiyyatın əhəmiyyətinin daha da artdığını vurğulayıblar. Qeyd olunub ki, ədəbiyyat insanın mənəvi dünyasının zənginləşməsində və milli-mədəni dəyərlərin qorunub saxlanılmasında mühüm rol oynayır.
Sözügedən tədbir zamanı müxtəlif yazıçıların imza günləri də təşkil olunub. Oxucular sevdikləri müəlliflərlə görüşmək, onlarla fikir mübadiləsi aparmaq və əsərlərini imzalatmaq imkanı əldə ediblər.
Heydər Əliyev Parkında keçirilən tədbirdə Azərbaycanla bağlı məqamların xüsusi vurğulanması iştirakçılar tərəfindən iki qardaş ölkə arasında mövcud olan güclü mədəni əlaqələrin növbəti təzahürü kimi qiymətləndirilib. Bildirilib ki, bu cür layihələr Azərbaycan və Türkiyə arasında ədəbi-mədəni əməkdaşlığın daha da genişlənməsinə və qarşılıqlı əlaqələrin möhkəmlənməsinə töhfə verir.
Tədbirdə iştirak edən yazıçı, tarixçi və beynəlxalq əlaqələr üzrə mütəxəssis Nicat Mədətli (Nejat Madatoğlu) də ədəbiyyatın cəmiyyətin inkişafında oynadığı rolun vacibliyini vurğulayaraq, mədəniyyətlərarası dialoqun gücləndirilməsinin əhəmiyyətindən danışıb.
.png)
