Türkiyənin Denizli vilayətində toy mərasimində havaya atəş açmaq istəyən 15 yaşlı şəxsin tüfəngdən açdığı atəş nəticəsində 11 nəfər yaralanıb.
EDnews xəbər verir ki, bu barədə "Milliyet" nəşri məlumat yayıb.
Hadisə Çivril rayonunun Kıralan məhəlləsində baş verib.
Məlumata görə, yeniyetmə toy mərasimində ənənəvi olaraq havaya atəş açmaq istəyib. Lakin yerə dəyərək sıçrayan qırmalar ətrafda olan insanlara dəyib və nəticədə 11 nəfər müxtəlif dərəcəli xəsarətlər alıb.
Yaralılar xəstəxanaya çatdırılıblar. Onlardan ikisi əlavə müayinə və müalicə üçün Denizlidəki tibb müəssisələrinə göndərilib. Həkimlərin bildirdiyinə görə, zərərçəkənlərin həyatına təhlükə yoxdur.
Hüquq-mühafizə orqanlarının əməkdaşları yeniyetməni ifadə vermək üçün polis bölməsinə aparıblar.
Faktla bağlı araşdırma aparılır.
