Danimarkanın baş naziri Mette Frederiksen amerikalıların Ukraynadakı müharibə, NATO və Avropa ilə bağlı "çox böyük qeyri-müəyyənlik" yaratdığını bildirib və Kremlin rəhbərinin sülh istədiyinə inanmadığını deyib.

“EDnews” xəbər verir ki, bunu Frederiksen "21 Søndag" nəşrinə müsahibəsində deyib.

"Amerikalılarla bağlı əvvəlki kimi  əminliyi hiss etmirəm", – deyə Mette Frederiksen bildirib.

O, Donald Trampın ikinci prezidentlik dövrünün birincisi kimi olacağını heç vaxt düşünmədiyini qeyd edib.

"Amma düşünürəm ki, hamı amerikalılar tərəfindən qeyri-müəyyənliyin bu qədər sürətlə yaradılmasına təəccüblənib və biz buna reaksiya verməliyik", – deyə Danimarka baş naziri vurğulayıb.

ABŞ və prezident Tramp Ukraynada müharibəni dayandırmaq prosesinə başladığı bir vaxtda Frederiksen Putinə və onun niyyətlərinə inanmadığını bildirib.
"Mən dürüst olmalıyam və deməliyəm ki, Putinə inanmıram. Onun Ukraynada sülh istədiyini düşünmürəm", – deyə o qeyd edib.

"Başa düşürəm ki, çoxları sülh sazişi və ya atəşkəsin yaxşı ideya olduğunu düşünür, lakin biz risk edirik ki, Ukraynadakı sülh əslində hazırda gedən müharibədən daha təhlükəli olsun", – deyə Mette Frederiksen əlavə edib.

Danimarkanın baş naziri, Rusiyanın genişmiqyaslı işğalının üçüncü ildönümündə Kiyevə səfər edən siyasətçilərdən biridir.

Qeyd edək ki, İsveç hökuməti Ukraynaya 1,2 milyard İsveç kronu (təxminən 113 milyon dollar) dəyərində hava hücumundan müdafiə sistemləri göndərməyi planlaşdırır.