“Turan Tovuz” klubu UEFA-nın qərarına etiraz edərək İdman Arbitraj Məhkəməsinə müraciət edəcək.
EDnews xəbər verir ki, bu barədə “Report” klubun yaydığı bəyanata istinadən məlumat yayıb.
Bəyanatda bildirilib ki, Tovuz təmsilçisi 2025/2026-cı illər mövsümündə bütün idman prinsiplərinə əməl edərək çempionatı 3-cü pillədə başa vurub və UEFA Konfrans Liqasında iştirak hüququ qazanıb.
Klubun açıqlamasına görə, UEFA İntizam Komitəsi “Turan Tovuz”un müəyyən kriteriyalara cavab verib-verməməsi ilə bağlı araşdırma aparıb. Qurum AFFA İntizam Komitəsinin 13 dekabr 2019-cu il tarixli qərarını əsas götürərək 2 iyun 2026-cı ildə klubun 2026/2027-ci illər mövsümündə UEFA-nın idman yarışlarında iştirakdan kənarlaşdırılması barədə qərar qəbul edib.
“Turan Tovuz” qeyd edib ki, sözügedən qərar 2019/2020-ci illər mövsümündə I Divizionda çıxış edən komandanın 7 futbolçusu ilə bağlı AFFA İntizam Komitəsinin tətbiq etdiyi qadağa ilə əlaqələndirilib.
Klub bəyan edib ki, qərarın dəyişdirilməsi və idman prinsipləri əsasında qazandığı Konfrans Liqasında iştirak hüququnun təmin olunması üçün bütün hüquqi addımlar atılacaq:
“Bildirmək istəyirik ki, klubumuz tərəfindən qərarın dəyişdirilməsi və bütün idman prinsipləri qorunaraq vəsiqə qazandığımız Konfrans Liqasında iştirakımızın təmin edilməsi üçün bu gündən etibarən bütün hüquqi addımlar atılacaq və İdman Arbitraj Məhkəməsinə müraciət olunacaq”.
Bununla yanaşı, klub UEFA Konfrans Liqasına hazırlıq planlarında hər hansı dəyişiklik olmadığını da açıqlayıb. Bildirilib ki, komanda üzvləri bu ay toplanacaq və Türkiyəyə təlim-məşq toplanışına yollanacaqlar.
.png)
.jpg)
.jpg)
