UEFA, Paris Saint-Germain klubuna qarşı ciddi cəza tədbirləri görməyi nəzərdən keçirir. Səbəb isə Münhendə keçirilən UEFA Çempionlar Liqasının final oyunundan sonra Allianz Arena stadionunda baş verən kütləvi iğtişaşlar və meydançaya ciddi ziyan dəyməsidir.
PSJ azarkeşlərinin finaldan sonra meydançaya daxil olub bayram etməsi nəticəsində stadionun çəmən örtüyü zədələnib, qapı torları kəsilib və bir sıra sahələrdə infrastruktur dağılıb. Xüsusilə də komandanın ilk üç qolunu vurduğu ərazilər ciddi şəkildə dağıdılıb.
UEFA, bu vandalizmin səbəb olduğu maddi və texniki zərərləri nəzərə alaraq, Paris Saint-Germain klubuna qarşı böyük məbləğdə cərimə tətbiq etməyi planlaşdırır. Bildirilir ki, azarkeşlərin meydançaya basqını və pirotexniki vasitələrdən istifadəsi UEFA-nın nizam-intizam qaydalarının ciddi şəkildə pozulması kimi qiymətləndirilir.
Allianz Arena rəhbərliyi və texniki heyəti təmir işlərinə dərhal başlayıb və Almaniya ilə Portuqaliya arasında Millətlər Liqasının yarımfinal görüşünə qədər meydançanın hazır vəziyyətə gətirilməsi mümkün olub. Lakin təmir xərclərinin PSJ-yə ödətdiriləcəyi gözlənilir.
Polis azarkeşlərin meydandan uzaqlaşdırılmasına çalışsa da, tam şəkildə qarşısını almaq mümkün olmayıb və xeyli sayda fanat stadionun müxtəlif hissələrinə daxil olub. Bu, təhlükəsizlik protokollarının zəifliyini də gündəmə gətirib.
Parisdə də vəziyyət fərqli olmayıb. Klubun tarixində ilk dəfə Çempionlar Liqasını qazanması Fransada da genişmiqyaslı qeyd etmələrə səbəb olub. Paris polisinin rəhbəri Laurent Nuñez RTL kanalına verdiyi açıqlamada bildirib ki, şənbə və bazar günləri ərzində ümumilikdə 563 nəfər saxlanılıb, onların 491-i Parisin özündə. O, qeyd edib ki, hüquq-mühafizə orqanları “PSJ-nin titulunu qeyd etmək bəhanəsi ilə həyata keçirilən zorakı iğtişaşlara” cavab verməli olublar.
PSJ-nin bu tarixi uğuru idman arenasında qələbə olsa da, sosial və təşkilati baxımdan ciddi narahatlıqlara yol açdığı üçün klub UEFA tərəfindən cəzalandırıla bilər. Növbəti günlərdə UEFA-nın bu məsələ ilə bağlı rəsmi qərarı açıqlanacaq.
Fatimə Şükürova // EDnews
