Argentina millisinin sabiq ulduzu Anhel Di Mariyanın karyerasında yeni – əslində isə köhnə, doğma bir səhifə açılıb. 37 yaşlı yarımmüdafiəçi karyerasının son mərhələsində vətəninə dönərək, “Rosario Sentral” klubuna qoşulub.

EDnews  xəbər verir ki, bu barədə məlumatı Argentina təmsilçisinin mətbuat xidməti rəsmi şəkildə təsdiqləyib.

Di Mariya üçün bu klub yad deyil. O, məhz “Rosario Sentral” akademiyasının yetirməsidir və 2005-2007-ci illərdə əsas komandada forma geyinib. Həmin dövrdə Anhel 39 oyuna çıxaraq 6 qol vurub və 2 məhsuldar ötürmə ilə yadda qalıb.

Uzun və zəngin karyerası ərzində Di Mariya Avropanın nəhəng klublarının formasını geyinib. “Benfika”, “Real Madrid”, “Mançester Yunayted”, PSJ və “Yuventus” kimi komandaların heyətində çıxış edən ulduz futbolçu, həmçinin Argentina millisinin heyətində də bir çox uğura imza atıb.

Onun “Rosario Sentral”a dönüşü həm klubu, həm də yerli azarkeşləri sevindirib. Ulduz futbolçunun doğma meydanlara qayıtması Argentina futbolunun nostalji və emosional bir hadisəsi kimi qiymətləndirilir.

 Fatıma Şükürova // EDnews