107 il öncə dövlətçilik iradəsinin, milli ruhun və azadlıq əzminin rəmzi olaraq əsası qoyulan Azərbaycan Silahlı Qüvvələri bu gün yalnız ölkəmizin hərbi qüdrətinin deyil, eyni zamanda onun suverenliyi və ərazi bütövlüyünün təminatçısı kimi tarixə möhür vurmuşdur.
Bu şərəfli, tarixi gündə xalqımızın təhlükəsizliyi və rifahı naminə fədakarlıqla xidmət edən bütün hərbçilərimizi dərin ehtiramla salamlayır, müqəddəs vəzifələrini böyük peşəkarlıq, əzm və qətiyyətlə yerinə yetirdiklərinə görə onlara təşəkkürümüzü bildiririk.
2020-ci ildə qazanılan zəfərdən sonra yeni reallıqlar fonunda Silahlı Qüvvələrimiz təkcə regionda yox, beynəlxalq miqyasda da sülhün, sabitliyin və hüququn simvoluna çevrilmişdir. Bu ordu artıq təkcə torpaq qoruyan güc deyil – o, həm də postmünaqişə dövrünün təhlükəsizlik memarı, mina təmizləmədən strateji kommunikasiyalara qədər geniş spektrdə fəaliyyət göstərən milli iradə dayağıdır.
Biz, vətəndaş cəmiyyəti qurumu kimi kimi, Silahlı Qüvvələrimizin həm daxili təhlükəsizlik, həm də beynəlxalq sülhyaratma proseslərindəki müsbət roluna diqqət yetirir, hər bir zabit və əsgərin əməyini yüksək dəyərləndiririk.
Bu əlamətdar gündə Vətən uğrunda canından keçmiş bütün şəhidlərimizin ruhu qarşısında baş əyir, qazilərimizə şəfa, əsgər və zabitlərimizə güc və qələbə ruhu arzulayırıq.
Qoy Azərbaycan əsgərinin mərd addımı daim Qarabağdan Zəngəzura, Arazdan Xəzərə qədər sülh, təhlükəsizlik və sabitliyin zəmanəti olsun!
Silahlı Qüvvələr Günümüz mübarək!
Umud Mirzəyev
Beynəlxalq Avrasiya Mətbuat Fondunun Prezidenti
